諸事不順

負能量到極點，以為自己已練好能自我處理壞心情消極思想之能，原來還差得遠。

按捺不住想打給朋友，就是不著邊際的胡扯也不打緊，不過能體會我的壞心情的朋友，普遍比我思想還悲觀的﹝所以才具有同理心﹞，只怕會更鑽入牛角尖端；樂觀開朗﹝與世無爭﹞的又只會覺得我在杞人憂天、傷春悲秋。

怎樣的人才是理想的傾訴對象？

哀

傳媒不斷追加的新聞，網民激烈的言論和揣測，眾說紛紜，看得越多，似乎越看不見真相。

我們現在還可以相信什麼、倚靠什麼？

我真的感到好悲涼。
 
整件事中唯一真實可見的，除了是菲律賓政府和所謂特種部隊的無能之外，就是傅太在危急時真的無私救了別人的小孩，還有梁生對家人的愛。

Vocal

選一個vocal的例子，要從sound quality的層面上，說出自己喜歡它的原因。

呵呵呵，比之前做的功課更難，花更多時間，因為往往就會被那vocal同melody吸引著，然後一齊唱~~~~~！

聲音

甚麼是好聲音？如何辨別好聲、衰聲？

既沒有提供範圍，只是抽象地略略形容過幾個專業詞彙，我也只能大概意會，也不知是對是錯。要我這個layman用文字去形容聲音、去表達自己的意見，就如瞎子摸象，也常常要提醒自己不要將之與編曲混為一談，所以偶然撞中一兩個keyword也頓時覺得自己是天才了。

其實你要我寫一篇《聽陳蕾士的琴箏》嗎？

《無如果》by Swing

Swing的新歌，很喜歡。
想起Olivia Newton-John的歌《Xanadu》，也想起電影《The Neverending Story》中一幕，主角騎在那隻叫Falcor大白狗上飛過雪山飛過海洋。

好笑

葉樹堃主持節目「名人廚房」，談及慈善組織「小母牛」，兩名無紀陪食美女搭訕：

葉：‧‧‧幫助一些山區人民‧‧‧
女：哦！讀書！
葉：其實唔係讀書，係希望佢哋可以藉以維持自己嘅生活，所以送啲牛呀、羊呀俾佢哋‧‧‧
女：俾佢哋食呀？
葉：‧‧‧係俾佢哋養‧‧‧‧‧‧

轉軚

其實真係意外、失望、心淡。

不過更感到氣忿的是劉慧卿同華叔的態度，難道你們不能預計到轉軚會令我們感到氣忿和意外嗎？又會否是因為你們從未曾認認真真、清清楚楚向大家交待呢？市民的反應是自然直接又容易理解，你們是否更應該平心靜氣去面對群眾呢？

一個在論壇上轉移視線投訴遭語言暴力、一個就質問群眾何為出賣。無疑被斥「生癌生上腦」的確過份，那「潑婦罵街」、「倚老賣老」就應該當之無愧吧。

良心仍在嘛？

六四

今年的六四燭光晚會，想不到出席人數會和上年二十周年的一樣多。之前還覺得氣氛與上一年差很遠，除了因為﹝年份上﹞未必如上年般有號召力，也覺得給公投搶了風頭。不過多得食環署“強搶民女”、曾特首的“超錯”出巡show及“政治中立”的劉校長幫忙煽風點火，感覺到今年政治打壓得很重。再加上越來越多港人﹝特別是名人明星傳媒帶頭﹞興起的微博，所有有關悼念六四的言論紛紛遭河蟹，港人雖然怕死，但就是越打壓越反抗，所以氣氛就在幾日內又熾熱起來。

八時到達維園，僅僅能坐在球場的最後最後位置。平時冷漠又囂張的港人，在這場合往往又會變得很忍讓，希望那冷漠又囂張的態度只是因為要應付生活的表象。

想著二十一年前死去的年青人、天安門母親、現在仍然被囚禁的，感受比起往年的還要深。香港是唯一一個可以進行公開悼念的中國城市，慶幸我們現在還有這種自由，還可以身體力行大聲高呼平反六四，高呼我們對政制發展的期望，在現在政治打壓越趨嚴重的年代，為什麼我們還不把握這刻尚未被剝奪的自由？為什麼有人還可以認為自己可置身事外？

我不算是一個熱衷政治活動的市民，對很多事都不算充份了解，但是單就六四事件，我是相信當年冒著生命危險將當晚屠城片段帶出來的記者，相信他們的片段，相信他們的說法，相信他們所相信的，我亦眼見現在中央政府如何對待學運人士。

當年我也只是一個小學生，對當時的新聞報導、父母當時的反應印象都很模糊；讀書時期也只是一個只懂讀書的書呆子，真的不問世事；但隨著年紀稍長，看到每年的報導、坊間的討論，也感激互聯網將有關的片段及資訊保存及再推而廣之，讓更多人了解事件的起因和其後的發展，漸漸確立自己的見解。當然，當中也有好多人妖言惑眾，嘗試自行詮釋、轉而視線搬弄是非，但六四事件就如一面照妖境，是非黑白，清清楚楚，有發生過就是有發生過。

六四當日看見有些同齡朋友於MSN說"Happy Friday Shopping Day"和Facebook大聲公佈當晚會BBQ，我是真的感到好冒犯、很氣憤！

我明白每個人都有自己的生活取向和態度，事隔二十一年，傷痛未必會再如當年般深刻，年輕的一代更加是沒有體會。傷痛或者會一時忘記，但只要你是一直生活在這地方，你是沒有可能對事情完全不知情的！

你可以選擇視而不見，你也可以選擇不悼念，我也不是要求你要素服要哭喪著臉地去過這一日，你絕對有權選擇當日去吃喝玩樂，但首先，我相信你的friend list上有很多人如我一樣是支持平反六四也認同當日應該是悼念的一日，你卻依然選擇當日在這“公眾地方”毫不避諱公然說你會去耍樂，感覺就如有人家辦白事，你仍然在祠堂劏雞殺鴨燒爆竹！

是我太敏感，還是你太不敏感呢？

「寧做痛苦的清醒者，不做無憂的夢中人。」

但如果你說你的立場取向和“那條死肥仔XX呂智偉”一樣，那我明白你此行徑的用意，請恕我錯怪了你，但麻煩請早揚聲表態，因為我真的不能接受我的朋友在這大是大非的事情上跟我的看法大相逕庭的。

倒後鏡

“兩人之間最悲哀的，應該就是看著一同攜手看過的美好風景，在倒後鏡中漸行漸遠吧？然後明白，再眷戀也囘不去了。”

讀著嫣薇小姐的這一段，真的感到心揪了一下。

任何事，真的是再眷戀也回不了去。偏偏我就是徹頭徹尾一個grumpy old woman，不是沒有新鮮事讓我感到驚喜，令我對未來還有憧憬，只不過轉眼nostalgia又會襲來。

別人看我是生活得很隨心，會說說笑笑，很懂得找樂。我也確實不喜歡常常懷緬過去、傷春悲秋，不要說最親近的知己好友，就連自己也會對這種態度懨悶。己所不欲，勿施於人。

之前讀著Brigitte Giraud那本法文翻譯本《愛情沒那麼美好》，其中一篇寫到“...那個時候，我還不知道我們可以一如往常生活，工作，在開玩笑的同時心如刀割...”“...我完全不知道，我們可以在傷心欲絕的同時，一面全神貫注工作，精神崩潰同時又笑容可掬，悲傷又自在，蒼涼又愛戀...”。其實每個人或多或少也是在這情況下亦步亦趨、恍恍惚惚的生活下去吧。

《Raising Helen》

其實有時都喜歡看一些荷里活輕喜劇，輕輕鬆鬆笑下無壓力不需用腦。

例如《How To Lose A Guy In Ten Days》，Kate Hudson主演，她做這類風趣機智的角色很討好，劇情就是說為了寫一篇關於如何於十日內甩掉男友的專欄，她要無所不用其技做盡一切極乞人憎的事令男友飛起自己，那些極其港女的行為及嘴臉真的非常攪笑。

剛剛看了由她於2004年主演的《Raising Helen》，她也是飾演一位成功的事業女性Helen，卻因為二姐意外過身，需要照顧她的三個小朋友，完全打亂了她原來自由快樂的生活。喜歡她那些好笑又witty的對白，看完明白到戲名為什麼叫Raising Helen，因為最終Helen由一位玩樂至上的自由人成長為一個懂照顧別人的好“媽媽”。

令我驚喜的是這套戲有好多配角也是粒粒巨星，我也認得很多個呀﹝不過都忘了名字也懶得去google﹞：

‧二姐就是Felicity Huffman，Desperate Housewives其中一個，也是我很喜歡的Transamerica的女角

‧大姐是Joan Cusack，是School Of Rock的校長

‧男友是Sex And The City裡Carrie的木匠男友

‧大女兒是Hero裡那個不死少女

‧細女是Little Miss Sunshine的Abigail Breslin，她在戲中的哥哥是她的親哥哥呢，也是童星

‧模特兒公司上司是影后Helen Mirren！

‧車行上司就是Pretty Woman裡那個好人酒店經理

《葉問2》

“呼呼呼唬唬砰砰呼呼唬唬呼唬唬砰砰砰”

咪好囉！今次《葉問2》集中武打場面咪啱數囉！

第一集《葉問》劇情簡直不知所謂，憑什麼可以拿最佳電影？票房？

不過拍續集無論如何都要入場，除了因為是甄子丹，今次更加有洪金寶喎，簡直就好似《異獸戰》一樣，異形大戰鐵血戰士，史上最強對最強！

‧陳腔濫調中西大戰劇情，不過都好過第一集。
‧武打場面確實精彩，尤其是萬眾期待甄子丹對洪金寶那場﹝可惜只有一場﹞，兩人只於圓桌上既要對戰又要保持平衡，周圍倒放的木凳就如梅花樁一樣，非常有氣勢！﹝不過到頭來只是給各師傅飛身上場應戰時踏過，及最後托著裂開了的圓桌之外，都沒有在上面打過，浪費了這場面設計。﹞
‧浪費了任達華！﹝純粹為了交待他未死，鋪路拍第三集？﹞
‧甄子丹的文戲好像比上次發揮得更少。
‧黃曉明的角色任何人也可勝任。
‧原來熊黛林的戲份可以比上集再少啲。
‧羅莽喜劇形象太深入民心，一出場已經忍不住笑，不過幸好他都有出手，總好過劉家輝於《蘇乞兒》中打都沒有打過，浪費人才！
‧那個擂台司儀﹝是《同事三分親》的外籍演員嘛？﹞反而搶鏡。
‧我明白目的是要發揮民族精神，打退外敵，但為什麼總是要那些外籍演員演得那麼狂妄？經常要他們大聲咆哮好像很辛苦。

‧題外話，開場前看了《飛砂風中轉》的預告，余安安聲嘶力竭的演社團大家姐，演得很辛苦，觀眾也看得很辛苦。

‧題題外話，想起上年一套荷里活片Taken，劇情一句講完：前特務勇救被擄女兒。由頭打到尾，拳腳清脆俐落，難得精彩荷里活動作片。

‧題題題外話，平日下午兩點幾都幾乎全院滿座，最近真的很多人跟我一樣無嘢撈嘛？

Hong Kong Dog Rescue

待業期間除了想做一些自己有興趣的事外，也想好好出點力回饋社會。想到無國界醫生，因為自己不是醫護人員也不是專業人士，但做一些辦公室工作也可以吧，但可能這團體很有名也很受義工歡迎，登記了之後完全沒有人聯絡過我，心想可能用不著我，又或者真的已有很多義工，也算好事。

後來發現了Hong Kong Dog Rescue這個組織，很贊同它的理念，服務對象也是自己很喜歡的狗狗﹝看了我之前的澳門之旅就知道我不是貓奴﹞，於是登記了做義工dog walker，很快就收到通知安排先上了orientation class。

參加orientation class差不多是一個多月前的事了，主要讓我們知道遛狗時要注意的事項，目的就是希望讓狗狗可以有多些活動伸展時間，而且多接觸人也可以讓這些曾是流浪狗或遭遺棄狗隻與人建立信任，也有助增加牠們受領養的機會，適應新環境與主人相處。

講解完後就帶我們入狗場了解環境。最初入去時真的會被吵鬧的狗吠聲嚇到，因為整個地方住了差不多150隻狗；每個狗籠平均住了兩三隻狗，有些地方是open area，狗隻會自由活動。

記得第一次遛狗只分別帶了五隻狗，因為不熟悉附近環境所以只行了最短的路線。狗狗其實很乖巧，知道會出街會非常興奮，有時甚至會奪籠而出，幸好有工作人員幫手不會太狼狽。遛狗時有些會好心急喜歡向前衝所以要握緊狗帶；有些又會很怕碰到迎面而來的其他狗狗，所以有時要輕輕用腳把牠們靠近牆邊隔一隔，讓其他狗狗先行。

喜歡這個組織作風很務實，真的是以這裡的狗狗為先。奉行No Kill，盡量收留，其實他們也不想太高調因為避免吸引更多不負責狗主將狗隻遺棄於這裡。很高興好友K小姐兩公婆也參加了義工行列。

不過最近HKDR被迫遷了，四月尾要由薄扶林搬到大埔﹝新址也是最近才落實﹞，聽聞新址地方小很多，所以最近頻頻作呼籲希望多些有心人能於限期前盡快領養。近況請留意創辦人Sally Anderson常常更新的blog。

Please adopt, no buy.

男人

噙晚睇明珠台卧底俏王子,
裏面有三個王子,
去到英國揾女朋友.
係一個真人show,
真正的王子揾平民女朋友.
內容唔係重點,
重點係其中一個王子的一番說話:
"我鐘意胸大樣靚,
人品几好都無用,

唔靚我都唔會要!!

我會擇20-29的女仔.

因為女人唔係葡萄酒,

女人係牛奶,

係有限期.

我一定會揾後生的!!"

身為女性的我,

當然好反感.

但想深一層,

他的說話正正係男人(不論國籍)的心聲.

我係男人都可能會係咁.

不過,

講呢番真心話的王子,

即中間最肥個件,

佢胸大肚大無樣無品,

都懶係咁大支野,

就算係王子都真係好惡頂.

正如好多無樣無型無錢無品的男人,

品評女性一樣.

如果下一世可以比我選擇,

我寧願做一個無樣無型無錢無品的男人,

都唔做一個有樣有波有錢有品的女人.

因為女人係牛奶,

而男人就係葡萄酒.

點計都係做男人易過日子得多!!

重墮輪迴 返回畜牲道？

仲未住！

經過一個星期苦苦思索，感性叫我繼續堅持，理性叫我面對現實。

本以為終於要重墮輪迴，想著不如騎牛搵馬做住先，昨晚未到十一點就上床就寢，今朝七點起身刷牙時忽然想起，不如再堅持一下先，就算要再做回老本行，應該不難，而且行規是合約一簽，離職後六個月內都不能入職同類型公司，那倒不如再待待看看。

終於想到一個看似理性的拒絕理由給自己交待了，於是又換上睡衣，把妝也卸了，打電話到公司說抱歉了。

終於弄清楚不是自己待懶了不願工作，而是真的不想做回老本行，仍然想試試心裡想做的，那不正是當初自己請辭的原因嘛？

離開與一起感覺一樣好

獨立宣言

唱 蘇永康
曲 李偲菘
詞 黃偉文
編 TED LO

習慣共你 緊緊擁抱 讓壯志消耗
沉迷地跳著舞 雙腳怎走路 漸漸不知道
人生 像墜入幸福圈套
背向世界 天荒與地老
從前相當自豪 然而今天擔心太早

＊害怕與你 抱擁中衰老
柔情蜜意 檔著路途
何妨讓你共我 都退開一步 面對天下地圖
從此 獨立但並不孤高
與你有約 找一晚再共舞
轉個範圍 再續情愫
天空海闊 比溺愛好

毋需要一起等天荒地老
人生也不只戀愛這一路
平常在兩個世界各自尋寶
重聚互訴安好
然後為對方拭去塵土

離開與一起感覺一樣好
人生也不只戀愛這一路
情人亦各有各那路途
祝君安好 放開懷抱＊

repeat ＊


離開與一起感覺一樣好，要用多少時間呢？

適可而止

啱啱喺AlexBB一篇關於最近孖妹嘅復出演唱會，留完言發覺都唔係好夠喉，於是再喺度嘈吓。

我都覺得由得佢哋啲粉絲自我陶醉一番都不為過
不過我真係好討厭佢哋講黎講去都係話自己好努力,叫人俾機會,支持佢哋... 老土啲講句:新界啲牛夠勤力啦,係咪都要頒個獎俾佢哋?!
做藝人知道自己長處,定位,你明知係sell靚樣sell青春咪拍下廣告拍多幾本寫真囉,唔好次次喺台上面喊到一句句話自己已經好努力...問題係你不嬲都唔係賣實力架啦... 你係努力咗都唔唱得嘛,唱片公司幫你傾掂個獎就乖乖攞啦,唔駛交咁多戲架!

我明白娛樂圈遊戲規則，並唔係針對佢哋喺樂壇上嘅貢獻，正所謂「曹操都有知心友」，每個藝人一定有佢哋自己嘅市場同生存價值，但我真係好討厭佢哋成日講黎講去三幅被，話自己已經好努力，每次都喊到一句句好似欠咗佢哋咁，啲戲真係好over無進步過﹝阿sa好少少咁啦﹞。啱啱出道就話啫，咁多年都仲係俾呢個七號感動樣同呢啲台詞，真係好懨悶架！

如果你話佢哋就係因為除咗呢樣嘢就唔知仲可以講乜，咁ok囉。

不過又唔係喎，話晒我都係觀眾丫，雖然睇電視唔駛錢啫，都諗句好啲嘅entertain下我丫。

我真係唔係針對佢哋架，仲有好多例子都又假又悶架，好似古sir到宜家依然鐘意彈句﹝真係笑唔出仲想喊嘅﹞食字gag或者IQ題，千fa仲成日失驚無神喪笑，都咁大個人咯，act your age啦！劉華都chok少咗樣啦！

《茶餐廳劇場》

上星期六同朋友去看《茶餐廳劇場2 之 拾壹查家產》。因為有朋友是要角，加上演出地方非常有趣，所以一定撐場！

顧名思義，是次演出場地為土瓜灣一間茶餐廳，故事內容亦是圍繞這地方。八點開show，要早點去罷靚位﹝因為場地所限只有廿多個座位﹞，更重要是要開show前落單食晚飯﹝$100包戲仲包一個套餐仲想點？﹞。心情其實好興奮因為覺得好得意，第一次食住牛肉炒意粉飲住凍檸茶睇話劇，又一路盤算著哪一個伙計或食客是演員呢。

本身甚少看話劇，雖然劇中大部分演員都是業餘﹝我的朋友更加是第一次演出﹞，但覺得他們真的做得很專業，氣氛很好，又會撩現場觀眾，有很多互動交流呀﹝show前我千叮萬囑我的朋友不要攪我因為我真的很怕羞不懂給反應呀！﹞

由於演出期間茶餐廳仍然會照常開門﹝不過只限外賣﹞，所以有時會有街外食客不知就裡突然入來，不知自己身處劇場中間，眼見有幾個人大大聲在說話而全場食客目光聚集於自己身上，嚇了一跳轉身就走，真的好好笑。

五月會改到中環演出，希望場場爆滿！

貓毛

我想只有真正愛貓的人,
都未必忍受到貓毛.
牡丹講得啱,
因怕貓跳樓,
所以就算我有露台,
我都唔多開.
屋企長期處於無空氣流通的狀態!!!
巨先生忍受不了,
每次去我屋企,
佢都趁我唔為意去剃我隻英短的貓毛.
我身為主人當然唔鐘意.
但我都忍唔住由得佢剃.
因為我隻英短係會伏係度唔郁比人剃!!
好似綿羊咁......
望住我隻英短好悠閒咁伏係地上面,
再望住巨先生流晒汗烏低身同佢剃毛,
唔怪得人地話貓先係人類的主人!!!!

被困澳門 張懸變伍佰

滯留於澳門八日，終於平安抵港。

是咁的，復活節假中旬，本來正於K小姐家中整餅，又為第二日友人BBQ聚會興奮中，突然收到電話，一直於澳門工作的二哥突然爆肺入院，由於怕他說話會感到辛苦，所以沒有細問詳情就趕回家中執拾細軟立即過大海。

到醫院後見到二哥精神尚可，只是說話不可太用力。他說其實兩日前已感到胸腔肌肉有點痛，但只是以為肌肉勞損不以為然，之後痛楚持續才去看醫生，照片後才發現一邊肺已壓縮了95%！需立即留院，第二日安排做手術。幸好手術順利，而且是微創手術，傷口不大，也康復得很快。

多得謝安琪，爆肺此症才比較廣為人知，但原來醫生說爆肺病人多是又高又瘦，又以男性居多，因為體格問題，呼吸時壓力都集中於肺頂部，容易形成氣泡爆裂。家族遺傳關係我二哥五尺九但只有130磅﹝之前就算狂吃健身奶粉都只是增了數磅而已﹞，就算不吸煙不做劇烈運動都絕對是高危人士。

待業中的我當然是留守當地照顧病人的不二之選。

回到二哥澳門家中，混亂情況實在是慘不忍睹，主要元兇是兩隻貓。

由於貓喜跳樓，所以主人通常都會長年將窗關上，空氣不流通又潮濕，屋中早已囤積著貓毛，廁所地面濕滑，貓腳印遍佈各處，簡直是人間煉獄。諷刺的是，貓本身卻愛整潔的。

一直都腄不好，因為一隻貓喜歡在半夜趁你熟睡時不停撲向你的被上，另一隻就會準時早上六點吵醒你。過了一星期，二哥的精神比我更飽滿。

終於入正題。原本早已買了飛去看張懸的演唱會，其實不熟悉她的歌，不過對她的live也是有期望的，可惜因要繼續留守澳門，縮數的我又不捨再花費數百元買船飛折返，所以唯有折讓給朋友。反而身為伍佰粉絲的二哥一早已買了於威尼斯人舉行的伍佰與陳昇演唱會，因為要留院所以就由我頂上，與他的香港和台灣Fanclub來的朋友一齊去看，而我亦勢估不到我人生第一次的舉燈牌行徑竟然因為他朋友的關係而獻給了伍佰！

第一次看伍佰的live，感覺melody是還可以的，但對他近年所走的路線其實真的是難以理解，以一身粉紅色太空服打扮唱的「太空彈」、帶動全場邊跳舞邊唱「你是我的花朵」，真的覺得非常匪夷所思，不過作為方大同粉絲的我又怎會不明白崇拜是盲目這個道理呢，所以當晚對二哥朋友的瘋狂行為我是絕對理解及感動的，大概就是那種「識英雄重英雄」的尊重吧。

反而事前對陳昇的演出期望更大，因為曾經在網上看過一些他在台灣pub的live，彈著結他、叼著煙徐徐唱出多首如「把悲傷留給自己」等經典，充滿經歷的滄桑聲線真的令人動容；可惜當晚可能受場地所限，形式都變成登台show，真的非常非常失望！

這次澳門之行就是如此結束，返港船程中對過去八日的印象就是刺眼的登台大射燈、摻雜著貓毛的搖曳粉紅身影。

劉若英 古天樂 酒窩與燕窩

http://www.youtube.com/watch?v=shdIjeLC-4s&feature=related

無意中係youtube睇到呢個mv,

一向都覺得劉若英同古天樂好襯,

尤其睇完<生日快樂>之後.

呢個mv好簡單,

但係好真實,

真實係因為我都試過!!

曾經試過同某人大吵,

係屋企好唔開心,

以為對方唔會理自己,

點知收到對方電話,

原來已經係我屋企附近.

於是我用九秒九的速度,

整亂屋企,

將d酒倒落洗手間,

亂放d罐係房......

已經係好多年前的事,

唔係睇到呢個mv,

我已經忘記左!!!

返工要迫自己硬淨,

自己解決問題,

做事要肯定.

但返工以外的時間,

唔怕整亂屋企,

唔怕任性,

到最後都可以有人照顧自己......

等部機郁......

我部電腦真係好慢......

等部機郁等到好辛苦......

於是望下我隻貓.

部機唔郁三分几鐘,

而佢就冇郁超過三分鐘!!

忍唔住畫佢......

望住佢唔郁,

相對之下,

覺得部機郁得快左......

又開會......又畫

會成日都要開,

開會梗係唔開心,

不過,

將開會的悶氣畫出黎又真係可以開心好多!!

上次開會,

L大主任見我係咁畫,

佢話:你就好啦!!識畫畫,開會都可以冇咁悶!!

我都覺得係!!

我有個小心願,

將我畫的"開會畫"結集成書!!

哈哈哈!!!

......

咁要開多d會......

《Kings Of Convenience - Live in Hong Kong》

上星期四晚到九展看Kings Of Convenience。挪威二人音樂組合，甚少聽他們的歌，因為不算是自己最喜歡的類型，感覺真的非常Simon & Garfunkel，熟悉的只有“I'd Rather Dance With You”﹝MV印象更深刻﹞和近期的“Mrs. Cold”，在香港不算很有名但竟然有主辦單位安排來開音樂會，其實非常難得也令人感動，﹝一廂情願地﹞覺得這是希望讓多點人認識好音樂多於商業回報的決定，所以要支持也好讓我對他們多點認識。

相約M君一齊去。M君是中學同學，不是玩開的一伙，不相往來，印象其實很模糊，中學畢業後就只是成為其他仍見面的同學中提及的一個名字。有賴Facebook又讓我們聯繫上，大概知道彼此的近況，更重要反而是了解大家的音樂喜好，要知道的是喜歡聽歌的朋友或者仍在，但仍然會買唱片及看音樂會的真的是所餘無幾，所以聊聊下就約好一齊去。多年不見氣氛幸好不算突兀，因為話題都是圍繞看過的live，真的是音樂大同呀！

這種恬靜的音樂風格但竟然是全企位，這是我開場前一直擔心並難以想像的情景，在外國有場次試過觀眾自發坐在地上欣賞但在香港是無可能發生的，戶外場地當然另計。音樂會遲了一個小時才開始，supporting act Jing Wong在觀眾等得最不耐煩的時間才被安排出場真的是大整估。

開場時就已提示觀眾於首三十分鐘不要拍攝，不過Eirik跟Erlend出場時就非常「體貼」地特登先擺了幾個pose給觀眾拍照，包括作狀solo、tune結他，再配合非常投入的表情，非常幽默。

整晚都是清新雋永的acoustic演出，加上兩人無懈可擊的和唱，不像其他band show強勁節奏般激動人心，但過後三日依然悠悠繞於腦海，可惜的是只有結他與鋼琴，沒有像之前於外地表現一樣有其他樂手參與，我可是非常喜歡“Boat Behind”的小提琴伴奏。雖然無去過北歐，但那裡出產的音樂凝造的氣氛卻好像真的會反映當地的自然風土景致，那湖泊、山巒、冷空氣，當中的表表者固然是Sigur Ros。

後部分歌曲較為輕快，Erlend表現更加活潑，指揮全場唱和，不過觀眾低沉的和唱效果好好笑，令Eirik都不禁笑說原來男歌迷較多。最後encore以“I'd Rather Dance With You”作結，配以Erlend嘅signature move，非常滿足。

While other bands made me bounce, they made me swing!

非誠勿擾

每一次都一定會有合理原因，所以我一直都不多說、不聞不問，怕會給你騷擾、令你心煩。

明白事理，但做不到心悅誠服，因為我都會感到失望。

一隻手是拍不響的，無論是爭執還是經營一段關係；兩種結果都達不到，因為連爭執的機會都沒有。

4D Ride

剛過去的星期日約了大學莊員吃晚飯，兼和其中兩位慶生。數數手指，大家都是認識了十年的老朋友，可惜有人需到外地公幹、有人一直於外地深造、有人抱恙、有人待產‧‧‧當晚人腳極唔齊只得五丁友，但都無損雅興，嘻嘻哈哈又過了開心嘅一晚。

第一次到銅鑼灣SML食飯，飯桌就好似大學飯堂一樣一字排開，集體搭枱，真的有點似回到從前讀書一樣。但食物份量很小，根本不對題，size M跟L都相差無幾，L就如外面吃的正常一碟份量，當晚我們一男四女都嫌不夠﹝堅決否認我們大食！﹞

近年大家的話題都逐漸由事業工作發展到成家立室，當晚提到其中一名正留院待產的莊員，比預產期遲了一個星期仍未作動，大家都憂心忡忡﹝最新情況是她剛於星期二順利誕下男嬰，母子平安，恭喜恭喜！實在是非常興奮！﹞

吃過生日蛋糕，好戲才在後頭。一向高調的C先生﹝專業人士，身居要職又有私人生意，有車有樓，正一「有錢仔」！﹞最近入手一架BMW開蓬跑車，提議載我們到厚福街吃甜品，為迎合他的一貫浮誇作風，大家不約而同交足戲大叫「我要帶闊邊帽同太陽眼鏡！」「哎呀但我無帶絲巾喎」「咁我要帶隻poodle先！」嘈到落停車場，C先生非常無癮。

我們大鄉里見到實物其實非常興奮，新車落地一個月，C先生似乎同架車唔係好熟，弄了很久才可以將車蓬打開，冷血的我們只是在旁邊不停說笑兼拍下他的狼狽樣。浮誇的C先生堅持要開蓬，雖然夜晚不算很熱，但香港街道人多車多其實真是不太適合坐開蓬車，更要經過充斥著廢氣的紅隧，大家都怨聲載道，特別是當停於鬧市紅燈前，路人全部高你一節，無遮無掩，好無安全感，感覺周圍的人都在暗笑我們幾名傻仔，謝小姐索性套上衛衣的hood，無眼睇。如果大家於上述時間地點見到一架開蓬跑車經過而車上乘客眼神閃縮，好大機會是我們！

吃甜品期間大家聊到最近幾套3D電影，我就說其實大家剛剛都親身經歷了4D之旅，特別是C先生，感到整盤冷水一直兜頭咁撥過黎！

坐立不安

好辛苦呀‧‧‧

三耳小姐講到自己正在找新工作，我都忍不住留了言。

她的情況比我好，起碼她其實一直從事自己喜愛的行業，只是同樣因為人事問題而辭職，她有的是經驗和人脈，不乏工作機會只是煩惱那一個才是自己心中所想。

相對於自己，之前一直從事的工作性質是金錢掛帥，收入算是不俗但絕對是與本性相違；不想繼續沉淪於這種輪迴，想轉行到跟自己有興趣的行業，但無相關學識無經驗無人脈，就算甘願由低做起也沒有什麼條件可以讓人給自己一個機會，難道就只憑自己一腔熱誠？恐怕很難說服人。

剛過完年，都再無藉口讓自己繼續放悠長假期，開始找新工作。難得從茫茫求職廣告中發現一份可以說是讓我最貼近自己喜好的行業，更難得的是工種正正就是自己一直所從事的，雖然行業不同，但性質一樣，資歷是合格有餘。

心想終於有機會可以擠身入行，立即寄出求職信，但一直無回音，不信邪再寄，結果一樣，實在抓爆頭也不明白為什麼連interview機會也沒有，自己不算是那麼不濟吧。前後個多星期，奇怪的是它依然繼續登相同的求職廣告，那就應該是還沒有請到人吧。唯有硬著頭皮打電話到公司問問情況﹝我實在未試過對一份工作如此desperate﹞，上星期回應說負責同事正在放假，今個星期才會跟進；今日星期三仍未收到電話，一直坐立不安，決定再打去問問，就算我沒有被shortlisted到好歹也得個知字丫。終於找到負責同事但說已經轉交給上司過目但還未有消息，著我等到月尾，到時還未有消息就可能真的落選了。

如果我真的落選了就請坦然相告，不要耍我吧，我實在缺乏耐性再繼續等。最慘的是在這段誠惶誠恐的等待中，這種「求不得」的心情令我不斷美化這份工作，憧憬著它會是如何美好，時日一久，就只會令我視此為唯一的出路，也令我現在對其他求職廣告都已經失去興趣啦！

真的很煎熬！

《獨102音樂會》/ Bridal Shower Party

星期六下午先到前荷李活道已婚警察宿舍舉行的《獨102音樂會》，是《港文化‧港創意》其中一個活動，今次是第三場也是最後一場，亦是整個為期兩個月企劃的最後一日，錯過了很多。

天氣不俗，冷鋒剛過了，是有點潮濕，但陽光不猛烈。音樂會於中央空地舉行，鋪了人造草皮，或站或坐，有一家大細，有外國人，有拖友；有的旁若無人，有的隨著音樂起舞，旁邊和中間亦放了一些裝置藝術品，吸引好多拍友。怎樣也好，只要不騷擾他人，獨樂樂抑或與眾同樂悉隨尊便。

香港以前沒有太多戶外音樂會，除了一些大型如《Wild Day Out》，其他的就只在南丫島、數碼港等偏遠地方舉行。不知道是因為近年開始多了團體舉辦，抑或是我比起從前較多留意，這類音樂會好像越來越多了，如定期在藝術中心外面舉行的《開放音樂》。很好呀，多了機會給不同獨立音樂人和團體作公開表現，也讓大眾接觸不同類型音樂，多點了解亦多了選擇。

看了少少就要趕到銅鑼灣Afterschool Cafe出席好朋友劉小姐的Bridal Shower Party 。

劉小姐是我的大學同學﹝未婚夫也是﹞，是我的primary filmmate，各類喜好如音樂、電影、展覽、旅行口味也相近。我們也是英國大好友，大學時相約將來要一齊到倫敦看看，可惜一直未能成事，偏偏她的蜜月旅行將會到西班牙，中途會逗留倫敦兩日，我倆戲稱一定要在那裡先私會一番一完當年約定。劉小姐也是烹飪高手，我常常說要合辦私房菜。

沒甚麼可給你，只可盡點綿力為你的婚宴作「音樂總監」，準備你喜歡的音樂。

衷心祝你倆白頭到老，永結同心！

學習

感激小時候媽媽迫我學鋼琴，讓我現在有一定程度和能力嘗試自學爵士樂鋼琴，因為老師難找。希望老來可以有所寄託。

也想學水彩畫，喜歡顏料和著水，淡淡的，徐徐數筆就可以勾勒出輪廓，眼前景物就給暈開融到畫紙上。世間所有事物從來都不應巨細無遺的給呈現出來。

初學西班牙語，雖然法語比較好聽，而我也比較喜歡意大利這地方。或者將來會用得著。

一直也喜歡電影，也愛音樂，兩樣都是可以避世的好地方。

最近多看點書，所以心情不太好。

培養了跑步的習慣，希望可以鍛鍊好身體，而且知道很多時候都只會是一個人走。

好想懂一些手藝，烹飪也好、做圖章也好、裁衣也好，前陣子真的有站在一旁看媽媽用衣車，農曆新年也跟她學弄蘿蔔糕。妄想以後一切都可以靠自己，不假外求。

你問我為什麼現在才學駕車，我答了第一句：「忽然覺得像游泳一樣，也算是一種求生技能吧。」

第二句沒有說出來：「想照顧自己，而且將來爸爸媽媽老了，出入接載也比較方便。」

整理書架

又賦閒在家，見到囤積於書架上的舊雜誌，書枱上架床叠屋的書，是時候要整理一下。

舊雜誌不是關於旅遊﹝新假期及U Magazine﹞，就是因為喜歡的偶像欣賞的音樂人﹝Suede、方大同﹞有雜誌訪問。

旅遊雜誌厚厚一本，真正介紹景點只有數十頁，其餘全部廣告。我非常有耐性地用cutter將想要保存的那數十頁旅遊資訊cut下，分門別類按地區﹝中國大陸、東南亞、歐洲‧‧‧﹞放入資料夾，餘頁棄掉。

至於其他音樂娛樂雜誌就整本留下，因為有時偶像欣賞的音樂人上了封面嘛，不過為數也只是幾本而已。

發現這兩本，一本是04年一月號NME，不是因為Beatles做封面，是為了右下角標了“Suede Split”，入面有一篇關於Suede解散的消息，標誌著迷戀偶像的少女時期的結束﹝誰又會料到之後有方大同的出現‧‧‧﹞；另一本是05年Milk，有Brett Anderson﹝Suede解散後主音另組The Tears出現﹞和我也很喜歡的黃耀明一同接受訪問，地點是龍門大酒樓，絕對是歷史性的一刻！

翻著翻著，回憶都湧過來了‧‧‧

清理了舊雜誌，將書枱的書搬上去，難得仍然騰空了一格書格，整整齊齊，好似連心情都整頓了不少。見咁高興，決定到書局逛逛慶祝下﹝！﹞

書局正值春季大減價﹝其實也不算好平﹞，購滿一定數目又可成為會員，於是一次過買了多本：

‧《建築家安藤忠雄 》─ 自學而成日本知名建築師，好像很鼓舞人心，很適合現在閱讀，一直想買但原價太貴
‧《今朝風日好 》─ 董橋著作，久仰大名，印刷非常精美，一直想拜讀但怕自己修養未夠，猶豫很久決定先選這部，希望能讀得上
‧《自在住 》─ 這本完全是「撞」回來，恕我孤陋寡聞，之前未聽過，放在書架最側邊，不起眼，但隨手翻閱卻感覺內容有趣，作者曾從事室內裝飾工作，從買/租樓到裝修講到生活，就算我現在未有機會自住，買來幻想投入下都好
‧《要省，不如不吃 》─ 從來無想過會買，不懂烹飪對食也沒有要求，絕對不是針對我這種讀者，但讀落又好似好精彩甚有生活情趣，即是我不懂烹飪也會喜歡看烹飪節目吧，所以買
‧《愛情沒那麼美好 》─ 翻譯法國小說，密封包裝，掀都無得掀，真趕客，純粹因為封面寫到「愛情死亡之前，有十一種彌留狀態」、「愛情被高估了」，對口味，又未試過如此「白撞」，又買
‧《孩子你慢慢來》、《請用文明來說服我》 ─ 喜歡龍應台，之前讀了《親愛的安得烈》及《目送 》，不知《大江大海一九四九》好不好看？

漏網之魚 ─ 《死在這裡也不錯》、《我恨我痴心》、《我執》

不知道幾時可以開始讀，因為其實仍有幾本書未讀完。

關於跑步 我想說的是‧‧‧

星期日參加咗渣打十公里﹝從來唔敢話自己參加馬拉松﹞，5:40起跑，西鐵最早班車係3:25，2:00已經起身﹝其實都無瞓過﹞，早啲出去食早餐。第一次參加，其實心情真係有啲興奮，有啲似讀書時秋季大旅行。

從來唔係一個運動人，大半年前已經開始跑步純粹只係希望建立稍為健康嘅習慣，不過都只係一星期跑兩日，最初由30分鐘十個圈開始，到45分鐘十五個圈，其實無快過，只係想練氣練耐力，直至天氣轉冷又停咗一排，有時回暖先落街跑下，比賽前一個月直情完全無跑過。除咗因為隋性，天氣都影響自己嘅練習，唔鐘意去gym room，因為悶，亦唔鐘意個環境，想呼吸戶外空氣而唔係冷氣。

寄存行李之後由維園行去東區走廊起跑點，天仲係黑，但好熱好焗，一啲風都無，我稍為做小小熱身就已經出晒汗。

iPod入面default有方大同，仲有Suede、Keane、Muse、Travis、Jason Mraz、Franz Ferdinand、Maroon 5、盧廣仲。

就算係第一次跑，都堅持唔影相，因為我真係為咗跑步，亦唔想阻人，同埋唔型呀！

對自己成績其實無太大期望，只係希望幾慢都好，都唔想行，想有啲堅持，不過最後都喺水站同斜路段路行咗。

因為無期望，一路上都無太大嘅心理壓力，學村上春樹咁講，只係同自己比賽，好鐘意嗰種知道無得返轉頭，唔可以中途離場，但亦唔會齋行唔跑，只係會悉力以赴嘅感覺，完成後真係好開心好有滿足感！

最後用85分鐘完成，超慢，本來希望於75分鐘完成都唔得，唯有賴今年係溫度同濕度都高、不利跑手嘅一屆‧‧‧咩啫，新聞都係咁講啦，全馬第一嗰個都比上年慢咗6分鐘啦‧‧‧嘻嘻

好快就可以攞返行李，聽聞前屆有人試過要等成半個鐘，今屆亦有人話水站竟然無水﹝好似係全馬路段﹞，慶幸自己一切順利，出年一定會再參加！

喜喜冰室 奇遇

今日去中環同銅鑼灣行街，之後特登去新開嘅「喜喜冰室」食下午茶。呢間茶餐廳標榜懷舊，裝修模仿六七十年代式冰室。

人唔係太多，但我只係一個人，所以被安排搭枱。

其招牌菜「雞批浮台」﹝即雞批放入豆茸忌廉湯中﹞，喺報章訪問有介紹過，可惜我對其綠色湯有點保留，雖然我想試下跟呢個餐嘅「香蕉克戟」，不過都無叫到，只係保守地叫咗個穩鎮嘅茶餐。

對面搭枱嘅一個女人就叫咗呢個餐，我見個雞批嚟嘅時候個侍應仲幫佢喺個雞批中間唧咗啲茄汁，好奇怪。

更奇怪嘅係，突然呢個女人問我介唔介意同佢share佢個香蕉克戟，因為佢好飽，食唔晒！真係嚇咗我一跳！其實我真係覺得好古怪，不過佢真係好有誠意，叫我唔駛多謝佢，係佢多謝我幫佢就真！同埋覺得拒絕佢好似令佢好尷尬，加上我又真係有啲想試下呢個香蕉克戟，所以最終就接受佢嘅好意啦！之後我就密密食，唔知同唔同佢傾偈好，好彩佢好快食完走咗。

不過我真係好多謝佢嘅好意，更加欣賞佢唔浪費食物嘅美德，更更更加欣賞佢為咗身體力行而有勇氣去同一個陌生人分享食物！

可惜我都係辜負咗佢嘅好意，因為我自己嘅茶餐食剩咗一半。

呢篇絕對唔係食評，因為我對食物要求唔高，對食物嘅包容度好高，只係識得分辨最好食同最難食嘅嘢，中間個range好大架。

我只係覺得呢度食物一般，食裝修氣氛多啲，而且我食完之後仲有啲肚痛添呀！

始終唔係好習慣好似其他人咁食乜都要影張相，所以照片欠奉。

《求婚大作戰》

賦閒在家，天氣又咁凍，最適合就係留喺屋企煲碟，做宅女。

《求婚大作戰》之前曾經聽人介紹過，宜家無記喺星期日早上都會播，確實係不錯看。

首先係關於時光倒流重返以前企圖改變歷史嘅橋段吸引我，一直對呢類故事非常著迷，例如多年前由靚仔Ashton Kutcher主演嘅“The Butterfly Effect”，大抵係因為我暗地裡都希望遇到咁離奇嘅事情從而改變我宜家咁潦倒嘅人生吧！﹝唉‧‧‧﹞

故事一開始就講男主角岩瀨健﹝山下智久飾﹞要出席青梅竹馬女主角吉田禮﹝長澤雅美飾﹞嘅婚禮。兩人自小學到大學都一齊成長，本應兩情相悅，偏偏性格吊兒郎當嘅健不解溫柔，一直都唔明白禮嘅心意，所以大家一直都維持愛鬥嘴嘅好朋友關係。喺婚禮上，健才意識到自己以往一直理所當然地認為禮會永遠待在自己身邊，恨錯難返，非常後悔，好希望可以重返以前對禮表白。當然之後妖精突然出現幫健實現願望。

編劇聰明嘅地方係每次妖精都藉著於婚禮上播放嘅兒時片段放映兩人從小到大不同嘅相片，令健有機會重返該相片中關鍵嘅時刻改寫歷史，所以每一集都會帶觀眾去佢哋某一段嘅時間，可以睇返一路嘅成長同發展。

睇到好多高中同大學嘅畫面，日式純愛描寫，令人緬懷過去單純嘅美好校園生活。山下智久將男角嗰種吊兒郎當嘅性格演繹得好好，有時做了一啲令禮開心嘅事卻又刻意唔表露抿著嘴笑嘅神情好吸引；長澤雅美唔係屬於美艷但好可人，呢啲係咪叫「治癒系」美女呢？另外加上桑田佳佑唱嘅主題曲，每次音樂一起都好感動呀！雖然唔知佢唱乜，但點解日劇啲主題曲可以有令人想哭嘅感動呢？﹝快啲聽下啦！﹞

http://www.youtube.com/watch?v=oWKCfECmG9A

當中有好多錯摸令健依然未表白，叫人睇到牙癢癢，但感動嘅地方係健每次都好努力改變當時自己大大小小無心傷害禮嘅事情，希望令禮明白到自己其實係非常在意。

暫時只看到一半，未知結局如何，每次健返回現實都仍然置身於婚禮中，即係未改變現實，但可能如妖精所講，過去嘅種種已經逐漸重燃禮對健嘅感覺。

不過我估結局依然照舊，婚禮如常舉行但新郎不是健，始終得不到的先會令人難以忘懷，先至係最好。

盧廣仲 - OH YEAH!!! 演唱會

「大家好，我是廣仲！」

真的high翻了！﹝國﹞

星期六晚同龍哥仲有其他朋友一行七人去九展睇盧廣仲演唱會，其實之前我仲以為會有方大同做嘉賓，或者喺觀眾席會見到佢啦，可惜落空喇，雖然龍哥都一直提醒我其實我哋係去睇盧廣仲‧‧‧

朋友幫忙訂飛，座位超前！係第五行呀，仲要係中間！容祖兒都係坐我哋後四行！我真係有衝動想掉轉頭同佢講「Joey唔好意思，我有無遮住你呀？」哈哈哈‧‧‧

只係出咗兩隻專輯，但整個演唱會絕無冷場，新歌如「七天」、「Oh Yeah」大家情緒非常高漲，「再見勾勾」一如所料跟住做動作，舊歌一出更加係全場雷動！一來係因為對歌曲非常熟悉，intro一起大家已經知道跟住唱，非常投入，就算唔熟悉嘅歌迷，佢嘅歌曲實在係容易唱和，會自自然然跟住哼，氣氛好好；二來係靦腆而不善辭令嘅盧隊長雖然只懂說Yeah，但偏偏如此觀眾反而變得主動，不斷互動交流，好熱情，有時觀眾又會刻意逗他揮手，他都會乖乖揮手回應，真係好可愛。

不過最主要原因相信係盧隊長台上忘我嘅演出，快歌嘅正能量快樂感染力、慢歌嘅深情感動，牽動著大家嘅情緒，就係佢獨有嘅charisma吧，加上有時佢不明所以嘅「熱舞」，真係睇得人好開心！

相信佢無預計有second encore吧，所以反而唱咗幾首未發表嘅新歌。

比起佢上年嘅演唱會，我覺得歌曲選擇反而上年較好，例如翻唱「I Feel Good」，仲有升起小舞台唱「Loving You」，技驚四座，初次唱有關吃早餐嘅「Rock And Roll的Style」，今年原裝重唱，仲有同一條嘅bling bling短褲，驚喜欠奉，不過依然係令人看得開懷！

世界恐怖童話故事

無意中係youtube發現的世界恐怖童話故事!!
淨係開頭我覺得已經好有恐怖的氣氛!
漢索與葛麗泰 (上)
http://www.youtube.com/watch?v=RZ8OCUL6Wss&feature=related
漢索與葛麗泰 (下)
http://www.youtube.com/watch?v=I-5oSPaC7fA&feature=related
我覺得個兩個細路畫得好好!!
雖然無關係,
但係呢個故事令我想起日本漫畫monster.
灰姑娘 (上)
http://www.youtube.com/watch?v=HjuEKHEmEEY&feature=related
灰姑娘 (下)
http://www.youtube.com/watch?v=NsBHpYGmbbg&feature=related
灰姑娘入面的顏色畫面公仔都好靚,
同漢索與葛麗泰好唔同,
漢索與葛麗泰的畫面好配合個恐怖氣氛,
不過我都係較鐘意用好fancy的畫面表達血腥恐怖的氣氛!
藍鬍子 (上)
http://www.youtube.com/watch?v=kZWWc8kzG1Q&feature=related
藍鬍子 (下)
http://www.youtube.com/watch?v=pPoMpJVDMzs&feature=related
我最鐘意呢個故事,
記得細個好似睇書睇過的,
但個名好似唔係藍鬍子.
不過d公仔最日本化,
最唔特別!!

我都好鐘意童話故事,
但其實好多都好黑暗好血腥好悲觀.
記得我失戀時買左本童話,
係<愛麗絲夢遊仙境>.
<愛麗絲夢遊仙境>其中一段內容係,
愛麗絲食左變大的旦糕後係咁喊,
之後愛麗絲拾起兔子的扇子搧自己,
於是又變返細,
之後愛麗絲就講左以下的對白:
"為什麼這些水會鹹鹹的?
對了!這是我掉的眼淚.
早知道會這樣,
我就不哭那麼久,
我竟然掉進自己的眼淚裏!"
唔知係作者有意,
定係當時失戀的我有心,
我簡直覺得係寫緊我的心情!!!!!!!
細個睇<愛麗絲夢遊仙境>完全對呢句對白無印象,
到大個左,
經歷多左,
重看<愛麗絲夢遊仙境>時,
估唔到會有咁深的感受.
童話世界應該係美好的,
不過創作童話的都係成年人,
美好的背後都隱含左好多黑暗.
龍哥

In that case...

You are my methadone disguised in hot choco, Khalil.

萬劫不復

就像沾上毒癮一樣，明知道每次那片刻的歡愉過後，心臟只會不住的抽搐，痛不欲生，卻又忍不住的沉淪下去，直至有天不勝負苛，停止跳動。

又像燈蛾撲火，受不住那火光洪洪的引誘，耀目的火花、溫暖的熱度，來不及伸手觸碰就已不假思索的栽進去，剎那就被吞噬至灰飛煙滅。

年廿九辦年貨

噙日拾左一日屋,

寫埋blog再拾下野已四點几.

今朝十點几又起身,

去左入貨......買衫!!

新年著新衫係中國人的傳統,

大條埋由咁放肆去買.

最開心係,

買完衫入左一間傢俬店,

好靚呀!!

比買衫仲開心!!

於是返屋企又拾屋又重新諗佈置!!

我好鐘意個塊啡色木牌,

上面的鹿係刻出黎,

我再用塗改液塗返d線,

清楚晒!!!好靚!

另外gratitude個木牌都好吸引,

但仲未諗到放邊好!

佈置自己屋企係一件樂事!!

雖然星期六日都唔洗返工,

但好多時都約人或要做返工野,

根本無比過時間自己咁.

呢兩日就唔同,

完全唔約人,

完全做自己野,

感覺好充實!!

過得好幸福!!

另外,

又再拾過書房的枱!!

咁樣做野都做得開心好多!!!

龍哥

少女年廿八

如果唔係年廿八,

我都唔可以立定決心大掃除.

雖然只係一個人住,

但我原來真係有好多好多野,

多野都係其次,

最恐怖係,

屋企真係好污糟,

我已經唔多下廚,

但我足足花左四個鐘洗廚房!!

單單一個廚房,

已經發現有好多我唔知几時買的野出現!

我一直拾,一直拾,一直拾......

咁就拾左十二個鐘......以上,

但仲未拾睡房,仲未洗露台,仲未洗雜物露台......

成個過程好辛苦,

不過都有驚喜,

就係揾返中二的寫作練習簿!!

個時我同同學A好重視呢本寫作練習!!

呀sir任我地自由發揮,

而我個時就練習寫詩!!

睇返真係覺得好少女!!!

節錄其中一部分:

"儘管照片已泛黃,

往事已淡忘."

仲有另一首的其中一部分:

"風送風,雨滴雨; 我送你,雨滴淚."

真係好少女!!!!

雖然自己睇返都覺得唔係几好意思,

但都好令人回味!!

學生時代寫的野,

依家真係寫唔返!!

拾屋拾到零晨先揾到呢本寫作練習,

又真係更加有詩意!!

另外,

我仲重新拾過書房!!

年廿九繼續努力拾屋!

婚禮

剛過去嘅星期日下午出席咗一個朋友嘅婚禮，原定於戶外舉行，可惜落咗成日雨，好彩臨時搵到一間中學嘅小教堂舉行。

一對新人都係我嘅中學同學﹝龍哥可能你都識﹞，中一至中三先同新娘同班，唔算好熟，最記得放學成日同佢去文具舖睇精品，好羨慕佢有好多零用錢買文具，最近一次舊同學聚會我講笑話佢當年教壞我，如果唔係佢成日帶我去買咁多文具，我一早已經儲到首期啦！

中六升唔返原校，同隔離班嘅新郎一齊到另一間中學就讀先識佢，佢好好笑架，反而同佢比較熟啲，所以都係由佢派帖俾我。

見到佢哋一齊咁耐終於步入教堂，都好替佢哋高興。

當日婚禮最令我不爽嘅係啲所謂「龍友」囉！

新娘一路慢慢由教堂門口行到禮台前，席間已經有好多部相機無論係單鏡定DC對住佢，我都明白嘅，大家想捕捉呢一刻，但當新娘去到禮台，竟然有七八部相機、即係七八個人圍住佢！都未計前面個啲撲出去走廊、或者喺席間突然彈起身要影相嗰啲！

理論上受薪大會指定攝影師都應該係得兩個，就算再加多一兩個友情協助攝影師，都唔應該咁多人喺出面，問題係之後全程都係咁喎！

原本係應該莊嚴嘅婚禮，okay就算氣氛唔需要好serious，但你哋係未應該尊重一下呢個儀式呢？okay就算一對新人唔介意，但係咪應該尊重一下其他真心想觀禮嘅來賓例如我呢？

或者你想透過鏡頭記住呢一刻再post上Facebook証明你技術有幾高超、你有幾叻攝到個位﹝但大多數只係証明到你部機有幾勁有幾貴因為就算你揸住部單鏡但依然用梗auto mode﹞，但我只想用我對眼記低呢一刻然後放喺我嘅腦海入面囉！

其實最令我不滿嘅都係大部分「龍友」真係有咁嘅自私心態多過佢哋想見證一對新人重要嘅一刻！

仲有就算你將雙腳微曲、背脊微彎，企圖或意圖盡量唔阻擋後面嘅人嘅視線，從而減低為其他人帶來嘅不便或不滿，唔work囉！你依然係阻Q住我架！

Muse - The Resistance Tour

尋晚去ARENA睇Muse‧‧‧頂！好睇到丫！

出名great live band嘅Muse，一開始"Uprising", "Supermassive Black Hole" intro一響起啲人已經癲晒，全晚最精彩係"Time Is Running Out"，全場同一時間、同一幅度、同一方向跳足全場！睇翻youtube原來後面都好多人，我都已經算企得比較前。

http://www.youtube.com/watch?v=EdxNhZPIU8c

之前不斷狂loop佢哋嘅歌可惜都唔係記得晒所有歌詞，不過完全無影響投入程度。隊band完全帶動到現場氣氛，totally insane！

唔係睇過好多band，只有Suede、Travis、Keane。Suede完全有個人情意結，係我最沉迷投入最多青春嘅一段good old days，最熟，所以主觀地永遠係我嘅best band；Travis同Keane我都好鐘意但相對地啲歌比較mellow；Muse vocalist Matthew Bellamy嘅強勁結他同falsetto，表現非常投入，加上好多歌都有政治抗爭主義，所以我會覺得Muse嘅live係最令人熱血沸騰！

另外背景播放嘅visual aid配合歌曲有theme，製作出色，加埋lighting，賞心悅目！

非常鼓勵未認識Muse嘅人去睇佢哋嘅live！

Suede Reunion

龍哥，你都知道我當年有幾愛Suede？

2003年9月我特登飛去倫敦睇佢哋喺ICA舉行嘅五場gigs，因為佢哋每場分別翻玩佢哋五隻大牒total五場，呢五場gigs喺我哋fans圈內絕對係一時佳話！嗰五晚嘅情景我到宜家都仲歷歷在目：五場分別翻玩所有albums同singles嘅歌甚至有因為Brett同前guitarist Bernard Butler嘅私人恩怨所以話唔再唱嘅"Stay Together"、認識好多嚟自唔同地方嘅"suedeheads"、喺after-show party可以同Suede每個成員合照同傾偈﹝其實只係say hi因為太緊張兼英文屎﹞、仲有獲Brett親吻我嘅手背一下﹝！﹞‧‧‧呢段經歷我估我會講到70歲！﹝唔理人想唔想聽！﹞

跟住Suede就喺同年12月解散！當時喺forum嘅氣氛簡直係愁雲慘霧。

直到最近聽到Suede為Teenage Cancer Trust籌款，決定於3月24日於倫敦Royal Robert Hall演出一場，line up仲要有Neil Codling，唔計Bernard Butler年代，呢個都可以話係好original、最合拍嘅line up！






但我竟然買唔到飛囉！

我唔想講嘢啦。

三個90後對一個70後

頭先坐巴士返屋企,
我坐巴士最後面個排的中間.
我右面坐左4個人,
係兩個兩個面對面坐的位.
坐我身邊的係一個70後的男人,
應35歲或以上,
坐佢對面同身邊的是三個90後的女仔,
應13,14歲.
我唔知佢地之間有何關係,
但係佢地係認識對方.
成段車程大約一小時,
係呢一小時入面,
佢地不停講野.
坐正70後對面個女仔條裙几短,
唔合腳坐,
然後彎身將70後的鞋帶解開,
再將右左兩條鞋帶打結.
70後好想解返開個結,
90後唔比佢咁做.
70後唯有屈服.
言談間,
70後不停用所謂的潮語想同90後打成一片,
90後唔受之餘,
不停咁串佢,仲用埋粗口鬧佢笑佢.
70後仲好開心咁笑,
然後,
70後話:"你著緊呢種絲襪的質地滑唔滑架?可唔可以比我摸下?"
另一個90後話:"嘩!你想非禮佢呀!!你就想!!絲襪?你老唔老套d呀!!呢d叫絲襪!"
然後,著短裙的90後又不停打70後的手,袋,錶......
一個字,
cheap.
三個90後覺得70後老套,睇唔起佢,笑佢,
但又開大條腿比70後睇.
對住個靚仔係咁都算,
對住個連自己都睇唔起的人開大條腿,
cheap.
個70後為左痴住D靚妹,
不惜比人係架公共巴士用粗口取笑自己,
cheap.
坐係佢地身邊的我,
體驗到cheap係無分性別同年代界限,
70後cheap男crossover 90後cheap女.
2010第一件親眼目睹的cheap爆事件.
龍哥

整理朋友

小時候，覺得朋友很重要，可以互相倚賴作伴，以為真得可以「友誼永固」。
現在明白世界很大，生活﹝其實是人﹞很複雜，當然不會那麼天真依然有這想法。

現在通訊科技發達，Email、MSN、SMS、Skype、Facebook、Blog，聯繫應該更容易，感覺卻像距離更遠，我想是因為選擇太多，彼此的關係其實可有可無，比想像中更脆弱，不堪一擊。

之前在MSN中刪除了一個朋友，其實已經沒有再在線上談話，刪不刪除其實也沒有分別，但可能就是需要這一個舉動去正式了結這段關係，意義更大。

大家是中學同學，從前常常相約看電影逛街，不算很熟，但畢業後也會偶然相約見面。後來不知是什麼原因，她不再找我，態度也突然變得很冷淡。後來我推算真正原因，大概是因為大家共同新相識的一個人吧，我什麼也沒有做卻被人如此對待，心想沒可能吧，心也淡了，沒有去求證，後來大家在朋友聚會中也只是點頭而過。

她後來卻在Facebook中主動add了我，猶豫了一下，她大概也只是為了替自己的friend list湊湊人數吧，幼稚。

說到Facebook，無疑最初大家的確興致勃勃，感覺真的很熱鬧；但現在自己也真的只當它是一個純粹可以聯繫到新舊相識的社交網，一些毫不相識的固然不會add，一些完全不想保持聯絡的也不予理會，不論他們有興趣否，就是不想他們知道自己的生活近況，免被人們茶餘飯後是非作人情。

有些人friend list人數幾百，你們明白friend跟acquaintance之別嘛？那數字真的可以令你感到自信心大了嗎？

越來越明白「君子之交淡如水」，那才會歷久常新吧。

能在大家相處時以誠相待、交心過固然可喜，當緣份盡了也不用太介懷，能真正作伴共同走到最後的又有幾人？畢竟大家也只是彼此的過客而已。

有時重新整理一下自己，可能會看得更多、感受得更多，走得更輕鬆更遠。

今朝七點

今朝七點已經坐緊車返工,
好眼訓,
當我閉目養神的時候,
聽到有個女人同人講電話......
女:"返工好辛苦,個八婆好黑人憎,竟然鬧我!我點?我梗係鬧返佢啦!!唔係點對得住自己!咁點?我精神上鬧返佢姐!"
正閉目養神的我,
半開眼望左佢一眼,
再望下周圍訓未醒的乘客,
心裏面講左句,
"返工真係好辛苦."
然後繼續閉目養神......
龍哥

做極都做唔完

做極都做唔完
做極都做唔完
做極都做唔完
做極都做唔完
做極都做唔完
做極都做唔完
做極都做唔完
做極都做唔完
做極都做唔完
做極都做唔完 X 無限次
我對天發誓,
當我做完d野之後,
我一定要訓餐飽!!!
呀!!!!!!!!!!!!!!!!!!!!
龍哥

口是心非

同非常熟嘅朋友好少會MSN，因為只會直接打俾對方傾；同一般朋友MSN遁例第一句都會禮貌地問一聲"How are you doing?"，我發覺近年真係唔識點回應呢啲causal greeting。

明明只係一句簡單社交問候語，問嗰個其實係無心，點解我呢個答人嘅要咁在意？

要費盡心思點樣答先唔會敷衍得黎又能夠簡單準確地表達實況但唔會洩露太多私隱之餘避免令對方有太大壓力應該點樣回應我？

事實上係凡人一個、生活平淡，稱唔上"great"；
"so-so"翻譯成中文其實係最貼近實況，但英文原意又會令對方誤會你生活不如意，於是﹝有出於關心或者其實只係好得閑嘅人﹞會追問你係咪發生乜嘢事；
如果只係因為俾老細省、尋日睇中嗰個袋今日再去睇已經無咗、方大同隻〈橙月〉攞唔到獎‧‧‧而講"bad"，又真係愧對被監禁嘅劉曉波同埋真正受苦嘅海地人民；

所以當生活還可以嘅時候，我會講"fine"，大方得體又唔會overrated；
當真係唔開心嘅時候，我會講"ok"，對方聽落又真係覺得ok喎唔會追問落去。

咁樣算唔算口是心非？

使唔使咁大聲

噙日我返半日工,
朋友C要返工,
所以我放工就立即去排隊買eason的非,
我排左兩個鐘,
未食飯又想去洗手間,
但咁都唔係最辛苦,
最辛苦係排我後面個個男人,
係排隊的時間裏面,
佢就講足咁耐電話,
講電話唔係問題,
但係使唔使咁大聲!!
大聲都算,
最討厭係每一句說話都要有個X字,
我發覺香港男人真係語言障礙,
唔講個X字就好似唔識點表達咁.
條友不停係電話同人講排得好辛苦,
收線後又打比第二個講同一樣的話.
條友:"喂!你睇唔睇eason?吓?唔X睇?點解呀?X!無,我咁啱經過咪排下,X!勁X多人,我一陣又要三點到長沙灣,X!......喂,你係咪係附近?不如你幫我排呀!"
條友就係咁不停X黎X去打電話,
我真係好想掌佢咀.
到最後,無朋友肯幫佢排,
結果佢就走左.
成個世界即刻靜晒.
佢走左之後,
我覺得有d人真係好怕自己一個,
好怕悶.
好似靜一刻都唔得咁.
仲有就係,
有d人好似成日同人講野成日吹水,
但佢地其實根本唔識溝通.
好似條友咁,
刪去所有X字,
刪去所有重複的字眼,
內容就係"自己排隊好辛苦,可唔可以幫我排!"
就係咁簡單!!!
如果唔係eason,
我真係唔想排落去!
係一大堆X聲之下,
我同自己講,
為左eason唔緊要啦!
可惜,
差唔多到我時,
15場$480的非全部只剩單叮位......
唯有買$280......
雙重打擊......
龍哥

與B小姐D小姐

龍哥

上次提及我同B小姐D小姐現在仍然常常見面，你奇怪點解我同佢哋嘅價值觀咁唔相同，關係都可以由中學keep到宜家？

我諗宜家我哋嘅關係已經變成「家人」吧？

我好肯定喺我宜家嘅朋友堆中，佢哋一定唔會係同我最夾、最好玩嗰班，我有好多事甚至未必會搵佢哋傾，但大概因為係兒時好友，相識太耐，佢哋依然會喺我嘅「朋友」一欄中佔好重要嘅位置。

細個時大家身處嘅環境比較簡單、思想又單純，無乜分歧，生活習慣同價值觀都相似，所以就算性格有些微分別都容易走埋一堆一齊讀書一齊玩；畢業後大家接觸嘅事物各異，發展不同，圈子又不同，價值觀漸漸變得不同都無可厚非，但可能我哋之間已經由「友情」變成「感情」，而且人越大，慢慢學懂包容*，一直以嚟大家都願意花時間同心思去經營呢段關係，所以先唔會無疾而終。As long as喺一啲根本價值同大是大非話題上意見唔係南轅北轍，我相信我哋嘅關係係可以繼續維持。

加上接觸嘅人越多，見識到好多利害關係、虛情假意，漸懂「人獸之別」，更會珍惜呢段建基於真友情、經歷咗咁耐嘅關係，因為知道得來不易。

*雖然話包容啫，但上次last minute send個SMS就咁就dismiss約咗成個月嘅飯局我係真心嬲架！

牡丹

[轉貼] 《將我枝 XX 放進去你的 OO 》

「我唔放我枝 XX 進去你的 OO, 點樣傳法力畀你, 點樣幫你轉運呀?」

如果你係一個年青模特兒, 當你聽到這句話, 你會有何反應?
如果你對自己的姿色, 才藝還有點信心,
呢個時候你應該兜巴摑說這句話的人,
回去好好再鍛鍊你的貓步, 化妝, 談吐, etc.
奈何你沒有自信心, 沒有耐性,
只想極速賺錢, 只想靠運.
於是, 你的 OO 畀 XX 插也是應該的.
大部份人不會同情你, 只會覺得你抵死.
好, 你不是年青模特兒,
你看到新聞, 還在笑她無知.
那麼當你聽到以下這句話時, 你又會如何呢?
「高鐵總站不建在西九, 又點會有吸引力? 點可以令香港不被邊緣化呀?」
聽來是兩回事, 但背後的邏輯都是一樣.
如果香港本身沒有吸引力, 你把高鐵總站建在那裡,
也不會有自由行抬錢來掃貨掃樓, 抬高物價.
如果香港本身有特色, 你不起高鐵,
還是會有大班人坐飛機來.
重點是我們自己爭不爭氣, 能不能提供我們有而人家沒有的東西,
而不是我們肯不肯將自己的 OO 給人家的 XX 插.
高鐵起好後的世界會怎樣, 沒人知道,
如果內地經濟轉差, 旨望北水打救, 他們睬你都傻.
如果內地經濟繼續發展, 到時什麼 LV, Chanel 限量版都會先在內地發售啦.
內地同胞為什麼還要來?
要令香港有吸引力, 不是要人有我人,
而是要想想有什麼東西是內地沒有, 香港有的呢?
下次有人叫你拿 669億元給他祈福,
你知道怎回答他嗎?
「我們已經很幸福, 因為我們有言論自由.
但我們還會更幸福, 爭取普選真民主.」
做什麼東西都要計算機會成本,
669億元如果不用來將高鐵總站起在西九,
轉用錦上路方案, 將省下的一半用來改善民生,
提高香港教育水平,做文化保育,
令香港百姓生活更好, 笑容更真,
工作起來服務水平更佳.
比建造全國都有的巨無霸工程, 更能吸引人來吧?
相反, 如果只想靠人幫, 靠僥倖,
做個沒姿色又沒知識的模特兒, 就算畀人插完,
還是會接不到 job的.
但願大部分香港市民的智慧, 比起希望性交轉運的 o靚模 高一點.

[請廣傳]

愛花, 寫於 2010年1月10日

To have the strength...

"For what it's worth: it's never too late or, in my case, too early to be whoever you want to be. There's no time limit, stop whenever you want. You can change or stay the same, there are no rules to this thing. We can make the best or the worst of it. I hope you make the best of it. And I hope you see things that startle you. I hope you feel things you never felt before. I hope you meet people with a different point of view. I hope you live a life you're proud of. If you find that you're not, I hope you have the strength to start all over again."

- "The Curious Case of Benjamin Button"

張敬軒、譚惠珠 ─── Shame on You!

一直都覺得你啲歌唔錯，係個人無乜character啫，不過都無乜問題。

最近四大唱片公司同無線反枱，旗下歌手接受有線訪問都開始用廣東話回答擺出姿態以示逐漸脫離無線操控。作為環球歌手嘅你呢邊箱以廣東話接受有線訪問，嗰邊箱即刻耍晒冧話“內疚”，SHAME ON YOU!!

無個性唔緊要，但無原則無腰骨呢下先係死罪呀！以你今日嘅受認同程度，你仲驚乜呢？唔係話你可以肆無忌大，但“以和為貴”同“世界仔”係兩樣嘢囉！

睇下，連你個friend都唔撐你呀！

“謝安琪前往廣州出席南方都市報舉辦「風尚中國榜頒獎典禮」，領取「年度音樂人獎」。對於同屬環球兼好友的張敬軒用廣東話接受其他電視台訪問感到內疚。 她說：「我都開始用廣東話接受訪問，我覺得方便啲，我冇內疚喎！唔知內疚係邊度嚟。」”


題外話：

星期日城市論壇主持謝志峰先生真係有guts！我不嬲無睇開城市論壇，但有幸見佢扯火！

之前就六四事件二十周年討論，嗰條死肥仔話“當時港人嘅捐款令學運「變質」”，一直克己、當年親身到北京採訪嘅謝志峰聞言即刻扯火，激動反問：「你講清楚幾時開始變質？我真係唔明！」。

啱啱過去嘅星期日就五區公投討論，一睹基本法委員會成員譚惠珠如人肉錄音機般引經據典。

“譚惠珠昨日出席港台節目城市論壇時，指《基本法》並無授權香港進行五區公投，故任何形式的公投都違反《基本法》。她承認本港無法律限制不能進行公投，但聲稱五區公投是違憲，「冇一個取締（公投）嘅法律，唔等於係合憲」，她又指香港不是主權國家，故「權力來自人民」、「還政於民」的說法並不成立。
上述五區公投違憲的理據甫出，連論壇主持謝志峰亦大惑不解，問譚惠珠：「《基本法》都冇授權我主持論壇，咁我宜家咪違反《基本法》？」引來全場掌聲。”﹝蘋果日報﹞
 
令人拍案叫絕！
 
作為主持人可能需要做到不偏不倚、不慍不火，但謝生嘅當場扯火行為，我唔覺得唔專業，反而覺得係人性之表現，作為傳媒人應有嘅風骨！
 
今日偶然喺記者"baowong"嘅blog爆炸手記中讀到，謝志峰先生於蘋果日報「最後撤出廣場的記者」一文中曾道：「甘於貧，支筆先會硬。」，叫同行唔好因為權勢而埋沒良心。

你好嘢！

What a fool I'd be to start complaining now...

Be Kind Rewind 〈低清老翻王〉

2008年嘅電影，之前上蘋果睇trailer已經好期待。條橋抵死、鐘意Jack Black、拍攝手法特技道具“無得頂”﹝因為導演係Michel Gondry﹞，必睇！香港好似反應一般，可惜。

好耐無試過喺戲院睇戲笑到拍晒大脾。最近買返DVD重溫，其實最想睇佢嘅features。

故事背景發生喺美國小鎮一間仍然出租錄影帶嘅小店，Jack Black意外地將店內所有錄影帶磁化﹝即係洗晒﹞，為咗幫佢喺該店打工嘅朋友﹝Mos Def飾﹞補鑊，兩人竟然諗到將電影重拍﹝！﹞企圖魚目混珠﹝！！﹞點知出街後竟然大受歡迎﹝！！！﹞

荒謬，我知，但我buy！點解？因為荒謬嘅橋用荒謬嘅手法拍攝製作所以條數啱晒！

翻拍經典好似Ghostbuster、Robotcop、King Kong、Men In Black﹝連獅子王都有，頂！﹞好睇在佢哋用最簡陋嘅道具、最low tech嘅拍攝手法去創造特技效果﹝簡單如將King Kong移近鏡頭，女角站於背景從而造出King Kong身形龐大嘅效果﹞當然有其他更精心設計嘅手法，令人拍案叫絕！全拜Michel Gondry嘅創意。

如果怪異但intriguing嘅角色造型係Tim Burton嘅signature，咁Michel Gondry最耍家嘅一定係佢low-tech但出色嘅visual art！

最估唔到嘅係電影前半部令人捧腹大笑，但後半部講述左鄰右里合力拍攝一部只屬於該鎮嘅電影以籌款保存小店免避清拆，首影就設喺該店最後一夜放映。見到大家嘅成果，見到電影投射出嚟嘅光與影散落到大家嘅面孔上，我即時諗起〈星光伴我心〉嘅最後一幕，為之動容。

 DVD後面features收錄製作特緝及訪問片段，好多有趣嘅making of，另外原來電影入面真係有好多當地市民嘅參與，全城投入，大家都為小鎮自豪，呢個正正係導演嘅心意，充滿人情味但絕不煽情，誠意之作！

當James Cameron大費周章不惜工本拍出3D電影Avatar講環保講人性，用錢堆砌出嚟嘅畫面無疑悅目，可惜無heart無soul。

﹝寫畢全文發覺句子結尾多用“！”而非單單“。”，證明真係從心底讚嘆出嚟！﹞

〈CHANGE〉

牡丹喺度！

‧龍哥你啲畫好靚呀！成日都想有本sketch book隨身，寫啲嘢又好，塗鴉又好﹝當然無你嗰啲咁靚﹞，記低啲idea又好，不過行動力低，遲遲未成事。不過我都知係藉口，有心嘅，求其攞張餐紙都可以寫啦！
我哋嘅Saturday Workshop你會唔會教我架？

‧龍哥你睇〈CHANGE〉會喊？！我呢兩日就係煲呢套劇﹝係囉，所以無寫blog囉‧‧‧﹞，我都睇到標晒眼水，因為套戲真係好──Q──悶！

內容主要係木村為繼承父親遺誌，由一個鄉村小學教師搖身成為議員再晉身成為日本總理，初生之犢進入腥風血雨嘅政治圈，面對奸險小人，不畏強權又要處理國內及國際大小問題。
感覺係───兒嬉！
無可否認，對日劇，特別係呢套木村擔正，期望製作應該係認真，包括劇情！
可能真係期望過高，又或者我唔應該攞West Wing同佢比﹝大家政治文化架構不同﹞但我真係覺得〈金枝慾孽〉好睇過佢囉！
犯駁處不贅。作為一套十集娛樂消閑連續劇，唔期望原原本本將真正政治實況刻劃出嚟，一來唔夠時間，二來唔係紀錄片，而且唔夠娛樂性，現實情況複雜得嚟觀眾又未必理解。
真正令我感到煩厭係佢將木村刻劃成一個充滿魅力、影響力嘅政治領袖，手法欠說服力，同時令身邊人個個好似白痴咁。
一個政治新人，思想單純，滿腔熱誠，不辭勞苦為人民服務，從而打動身邊人為佢效勞，條橋係成立嘅，但係咪每次佢只要三幅被咁，將“宜家小學都唔教”嘅做人道理、“阿媽原來係女人”嘅真心話，大義澟然咁講出嚟，就可以將深謀遠慮嘅政治老狐狸嘅思想一下子推翻；只要做一啲所謂與眾不同、紆尊降貴嘅動作，如作為總理為下屬倒杯茶，就可以令政敵徹底改變立場，棄暗投明，向佢俯首稱臣？呢套“動之以情”嘅方程式喺套劇入面又真係所向披靡喎！
最後個段十五分鐘向人民真情剖白直頭令我呵欠連連呀，不如放多啲時間刻劃人物處境吧啦！
當然，要豐富劇情之餘又要深化人物角色係高難度，但唔難駛鬼出錢請你班編劇導演咩？

真係睇到我割凳床！

牡丹你去左邊......

開會畫

開會你會做什麼?

我會留意下身邊人拎住支筆做什麼.

最常見的係用原子筆將英文字或中文字中間筆劃的空格填滿佢.

又有照抄下開會流程張紙上面某一些字或句,即純粹練下字咁!

又或者平日用開右手寫字,突然試用左手寫.通常又係抄返開會流程張紙上面某一些字或句.

又或者畫下單線曲線圖案.

咁啱坐隔離的係熟人,又會係開會流程張紙上面的空位或背面寫類似係"好悶 / 完未 / 想走"等字句.

以上所有我當然一定做過.

不過,

我最常會做的係畫下畫,

我會叫呢d做開會畫.

由於環境唔太方便,

只可以用最簡單的線條完成.

以下係我的代表作,

我係指好能代表我開緊會的心情之作!

你唔洗知道以上個會的內容,都可以感受到個會的意義.

不過我都試過係環境許可之下畫得細緻些:

題外話,

我今日終於知道最辛苦的會係什麼會!!

就係放工開完會後,

當你返到自己位諗住休息下,

突然有個同事同你講:"開會啦!"

原來全世界最辛苦的會叫:

"開完會後再開一個事先唔知要開的會".

係呢個會入面,

我再無畫過任何野......

龍哥

由<南京南京>到<最後武士>到我自己

早前因為工作關係,

book左戲院一間house睇<南京南京>.

<南京南京>上映時,

我完全唔想睇,

估唔到依家因為工作被迫睇.

我用"被迫",

係因為我好怕睇咁沉重的歷史電影.

我連睇木村的CHANGE都會投入到眼濕(係集集都會!)

我點可能係戲院睇<南京南京>!?

但我竟然無喊,眼濕都無!

唔係拍得唔好,

而係拍得太好,太真,

反而令我喊唔到.

我一路睇,真係一路問,

點解可以咁無人性?

點解可以咁對中國人?

點解可以咁對待一個人?

而最大的點解係,

點解係同一時間入面,

可以有咁大班人都咁無人性?

呢大堆點解令咁眼淺的我都一時流唔出一滴眼淚.

呢大堆點解一直無答案,

直到呢排我無意中係電視睇<最後武士>The Last Samurai時,

我終於知道點解.

<最後武士>The Last Samurai係03年上映,

我無睇,因為我覺得Tom Cruise個髮型唔好睇!

我起初都唔多集中望個電視,

但愈睇愈有意思.

最吸引我的係一個叫勝元盛次(Katsumoto)的日本武士.

因為當時日本正值明治維新時期,

明治天皇要日本全盤西化,捨棄日本的傳統文化,

當中包括廢除武士道.

勝元盛次(Katsumoto)力保武士精神,

隱居係深山......

故事到最後係Tom Cruise同勝元盛次(Katsumoto)的武士軍隊,

用代表"勇武"的武士刀對抗用西洋火槍的政府軍.

個一幕戰爭好難忘,

武士道建基於義、勇、仁、禮、誠、名譽、忠義、克己.

個一幕,

一個個堅守義、勇、仁、禮、誠、名譽、忠義、克己的武士,

都死係西洋火槍之下.

兩邊對峙的都係日本人,

但係一邊著西洋軍服,

一邊著武士服.

到最後的武士勝元盛次(Katsumoto)都死埋,

我明白點解會有南京大屠殺,

因為日本將自己本身的義、勇、仁、禮、誠、名譽、忠義、克己,

一下子都抹殺了.

連自己的文化同精神都可以抹殺,

咁去屠殺其他人又有几困難?

我對日本的武士道唔熟悉,

我只知道武士要履行義、勇、仁、禮、誠、名譽、忠義、克己,

咁樣先能够保持榮譽尊嚴,

如果唔係,

就要切腹.

我覺得武士道本身好淒美.

咁淒美的武士道比日本人自己抹殺左,

淒美之中又再添上可悲.

原來最可怕的事係自己抹殺自己.

咁我自己呢?

返工賺錢供樓......強化自己的同時,

我又係咪抹殺緊自己內在的精神?理想?希望?

......

再諗我怕會飄到好遠!

係時候停一停!

龍哥

THE OUTLOOK MAGAZINE 新視綫主編 陳皎皎

噙日偶然去灣仔128商場,
入左一間賣內地雜誌同書的鋪頭.
我見到呢本THE OUTLOOK MAGAZINE 新視綫,
個封面好吸引,又厚,
再睇,只售25蚊, 即買.
係巴士,忍唔住拆開睇,
因為感冒未清,頭痛,加上架車几暗,字又細,

我只係睇圖先,
......已經好吸引!!
我只能用個"堅"字黎形容!!
首先"面子問題 / THE FACE",
有多張政要的相,
第一張係喬治布殊係佛羅里達州視察學校時,
助理向布殊報告"一架飛機撞向世貿大厦"時的表情.
另外又有酒井道歉的相,
仲有陳冠希!
之後就到"解讀面孔 / DECORDING FACES"
原來19世紀末,法國神經學家Duchenne de Boulogne利用電診法和電流刺激研究表情!
區分發自內心的笑和其他種類的笑容!
內頁有好多19世紀末唔同人唔同表情的黑白相!
之後到"一面之詞 / ONE WORLD,ONE FACE"
一開首講述經過改頭換面的2年零7個月,
殺人犯Tatsuya Lchihashi終於被捕的故事.
然後到"面孔統治術 / FACE OF POWER"
內容講述英國女王The Queen Elizabeth ll應該係出現在貨幣上次數最多的君主!
什至可以話通過錢黎了解佢的一生!
之後仲有"美人, 臉上的消費陰謀 / BEAUTY CONSUMPTION"
"以貌取人 / FACE OR FATE"
"面孔即種族 / YOUR FACE IS YOUR RACE"
"面孔地圖 / MAP OF THE FACES"
"藝術家,面孔迷狂 / BEAUTY, CONSUMPTION OF THE FACE"
......
注意!!只售25蚊!!!
拎住呢本THE OUTLOOK MAGAZINE 新視綫,
雖然我未有時間睇晒,
但已經覺得好......滿足!!
咁認真的一本雜誌,
我決定會好認真咁睇!!
最令我驚訝的是,
主編陳皎皎生於1980年.
真係好令人感動!

龍哥

Grow Old With You

龍哥

我又唔係好記得我哋會lunch預先約埋行返屋企，只係記得每朝早會約喺OK對面嘅士多等一齊行返學。
其實我都好鐘意同知心朋友一齊散步傾計。有次假日我去探阿鳳，無特別安排節目就只係喺佢屋企附近散步傾計。
我最近又發現喺上水同粉嶺之間嘅一段路好靚好舒服，假日無乜車，兩旁有好高嘅樹，有時會有人踩單車經過，好似上海﹝其實我無去過上海，只係覺得好似方大同【橙月】隻碟入面喺上海拍嘅相﹞。

宜家我覺得同啲朋友又進入另一階段，就係好少再行街shopping，反而只會約食飯食tea見面傾計。話當年。
人大咗同朋友相處嘅習慣唔同咗，口味都唔同咗。 以前就話懶型，扮靚靚去啲fancy食店cafe呃埋自己話"quality of life"！宜家實實際際最好上朋友屋企過。最近同幾個閨中密友食飯已經由西式食肆逐漸轉去茶樓飲茶，我哋仲戲言遲啲應該會約埋一齊返深圳揼骨，就好似我哋阿媽咁。

另
其實，成日話當年，真係代表老咗架！
不過，其實我覺得能夠同朋友們一同成長係一件幸福事。

牡丹

一段路

噙日完左陸運會後,
我同豬九兩個同事走.
由元朗大球場行去元朗廣場個邊,
初初,我覺得行咁遠好辛苦,
好唔想行.
跟住豬九同事一就話,
邊行邊傾好快會到.
我地一路行一路傾,
果然好快到.
豬九同事一:"好難得可以咁傾計."
我:"你成日都係豬九撩我地傾計架啦!"
豬九同事一:"唔同!!你唔覺我地好少係街度傾計?我鐘意一路行一路傾!"
豬九同事一的說話,令我諗返讀書個陣時.
中學個陣,我好鐘意放學行返屋企,
有時同學送我,有時我送同學.
我同牡丹唔同班,
但住得好近.
當時我的好朋友同牡丹一班,
咁我就識左佢.
我唔記得我係點樣同牡丹熟,
我只記得我地的友誼係建立係個段回家的路上面.
好多時,我地lunch會預先約定行返屋企.
中五後,
我地唔同學校,
到大學到工作個時,
中間有大段時間無見.
但到依家,
我地唔洗warm up,
都可以好feel free講自己的諗法同理想.
以往一段段的路程,一段段的對話,
成為我地友誼的植根!
另外,
我發現人大左,
好多時出街行的目的都係shopping,
我已經好耐無特別為同人傾計而走一段路.
可能勁感冒,
突然諗起好多往事,情緒有點down,
又或者係,
我覺得自己真係老左啦!
龍哥

The Ex

"The Ex" - knife holder
from http://www.thinkgeek.com/

「出嚟傾啲嘢，攪啲嘢呀」

近幾年於朋友閑談會面時經常出現嘅一句說話。

剛剛畢業出嚟時雄心萬象、對社會充滿理想，對自己期望甚高；再過多幾年係社會打滾過，又受唔住現實殘酷打擊，所有幻想破滅。

呢啲都係身邊人寫照。

有啲人*安於現狀/一蹶不振，選擇繼續「*生活/生存」落去。﹝呢啲先係高人！看破紅塵，屬大智慧！﹞

有啲人依然充滿理想、勇氣，選擇繼續為理想打拚，與社會不公平抗爭，直頭係向世界出發！﹝對此本人係深感佩服！﹞

至乞人憎係中間嗰啲！明明肉體行為上已經妥協，偏偏思想精神上又心有不甘。條件、能力、運氣、理想、勇氣、行動力，樣樣都得少少，發唔到圍但又死唔去，蠢蠢欲動其實係坐以待斃，鬼鬼祟祟咪就好似曱甴咁囉！

無錯，我就係中間呢類！

我深信呢個blog就係蠢蠢欲動之始到坐以待斃當中不可或缺嘅一環。

*請自行詮釋，刪去不適用者。

我把聲響遍元朗......

今日學校陸運會,我負責做司令台.

晨早8:50未夠,

我已經開始宣佈男女子甲,乙,丙組400米第一次召集!

除左lunch,

一直宣佈賽事到五點.

如果你住係元朗大球場附近,

在2010年1月7日,星期一,

晨早8:50打後,

有無比一把女聲嘈醒左?

如果有,

個把係我把聲!

不幸的是,

聽日2010年1月7日,星期二,

晨早8:35打後,

都會繼續係我把聲!

我把聲響遍元朗......大球場一帶!

龍哥

開發自己

噙日同牡丹打邊爐,我地傾左好多好多野.

返到屋企,

我突然覺得外面的世界好大,但其實自己內在的世界都唔細.

自己內在仲有好多未被開發的地方.

我拎返以前的sketch book出黎,

我突然睇返2005年我畫左一半的故事.

2005年的我,畫到中途無靈感就停左.

我同自己講,有時間再續.

但係,一停就停左4年多!

噙晚同牡丹的邊爐,加埋呢個4年多前畫到一半就停左的故事,

令我更加覺得,時間係過得好快好快.

我要趁自己仲有閑情依然故我的時候,

要好好開發屬於我自己的世界.

一於向自己出發!!!

龍哥