喜喜冰室 奇遇

今日去中環同銅鑼灣行街，之後特登去新開嘅「喜喜冰室」食下午茶。呢間茶餐廳標榜懷舊，裝修模仿六七十年代式冰室。

人唔係太多，但我只係一個人，所以被安排搭枱。

其招牌菜「雞批浮台」﹝即雞批放入豆茸忌廉湯中﹞，喺報章訪問有介紹過，可惜我對其綠色湯有點保留，雖然我想試下跟呢個餐嘅「香蕉克戟」，不過都無叫到，只係保守地叫咗個穩鎮嘅茶餐。

對面搭枱嘅一個女人就叫咗呢個餐，我見個雞批嚟嘅時候個侍應仲幫佢喺個雞批中間唧咗啲茄汁，好奇怪。

更奇怪嘅係，突然呢個女人問我介唔介意同佢share佢個香蕉克戟，因為佢好飽，食唔晒！真係嚇咗我一跳！其實我真係覺得好古怪，不過佢真係好有誠意，叫我唔駛多謝佢，係佢多謝我幫佢就真！同埋覺得拒絕佢好似令佢好尷尬，加上我又真係有啲想試下呢個香蕉克戟，所以最終就接受佢嘅好意啦！之後我就密密食，唔知同唔同佢傾偈好，好彩佢好快食完走咗。

不過我真係好多謝佢嘅好意，更加欣賞佢唔浪費食物嘅美德，更更更加欣賞佢為咗身體力行而有勇氣去同一個陌生人分享食物！

可惜我都係辜負咗佢嘅好意，因為我自己嘅茶餐食剩咗一半。

呢篇絕對唔係食評，因為我對食物要求唔高，對食物嘅包容度好高，只係識得分辨最好食同最難食嘅嘢，中間個range好大架。

我只係覺得呢度食物一般，食裝修氣氛多啲，而且我食完之後仲有啲肚痛添呀！

始終唔係好習慣好似其他人咁食乜都要影張相，所以照片欠奉。