「出嚟傾啲嘢，攪啲嘢呀」

近幾年於朋友閑談會面時經常出現嘅一句說話。

剛剛畢業出嚟時雄心萬象、對社會充滿理想，對自己期望甚高；再過多幾年係社會打滾過，又受唔住現實殘酷打擊，所有幻想破滅。

呢啲都係身邊人寫照。

有啲人*安於現狀/一蹶不振，選擇繼續「*生活/生存」落去。﹝呢啲先係高人！看破紅塵，屬大智慧！﹞

有啲人依然充滿理想、勇氣，選擇繼續為理想打拚，與社會不公平抗爭，直頭係向世界出發！﹝對此本人係深感佩服！﹞

至乞人憎係中間嗰啲！明明肉體行為上已經妥協，偏偏思想精神上又心有不甘。條件、能力、運氣、理想、勇氣、行動力，樣樣都得少少，發唔到圍但又死唔去，蠢蠢欲動其實係坐以待斃，鬼鬼祟祟咪就好似曱甴咁囉！

無錯，我就係中間呢類！

我深信呢個blog就係蠢蠢欲動之始到坐以待斃當中不可或缺嘅一環。

*請自行詮釋，刪去不適用者。