婚禮

剛過去嘅星期日下午出席咗一個朋友嘅婚禮，原定於戶外舉行，可惜落咗成日雨，好彩臨時搵到一間中學嘅小教堂舉行。

一對新人都係我嘅中學同學﹝龍哥可能你都識﹞，中一至中三先同新娘同班，唔算好熟，最記得放學成日同佢去文具舖睇精品，好羨慕佢有好多零用錢買文具，最近一次舊同學聚會我講笑話佢當年教壞我，如果唔係佢成日帶我去買咁多文具，我一早已經儲到首期啦！

中六升唔返原校，同隔離班嘅新郎一齊到另一間中學就讀先識佢，佢好好笑架，反而同佢比較熟啲，所以都係由佢派帖俾我。

見到佢哋一齊咁耐終於步入教堂，都好替佢哋高興。

當日婚禮最令我不爽嘅係啲所謂「龍友」囉！

新娘一路慢慢由教堂門口行到禮台前，席間已經有好多部相機無論係單鏡定DC對住佢，我都明白嘅，大家想捕捉呢一刻，但當新娘去到禮台，竟然有七八部相機、即係七八個人圍住佢！都未計前面個啲撲出去走廊、或者喺席間突然彈起身要影相嗰啲！

理論上受薪大會指定攝影師都應該係得兩個，就算再加多一兩個友情協助攝影師，都唔應該咁多人喺出面，問題係之後全程都係咁喎！

原本係應該莊嚴嘅婚禮，okay就算氣氛唔需要好serious，但你哋係未應該尊重一下呢個儀式呢？okay就算一對新人唔介意，但係咪應該尊重一下其他真心想觀禮嘅來賓例如我呢？

或者你想透過鏡頭記住呢一刻再post上Facebook証明你技術有幾高超、你有幾叻攝到個位﹝但大多數只係証明到你部機有幾勁有幾貴因為就算你揸住部單鏡但依然用梗auto mode﹞，但我只想用我對眼記低呢一刻然後放喺我嘅腦海入面囉！

其實最令我不滿嘅都係大部分「龍友」真係有咁嘅自私心態多過佢哋想見證一對新人重要嘅一刻！

仲有就算你將雙腳微曲、背脊微彎，企圖或意圖盡量唔阻擋後面嘅人嘅視線，從而減低為其他人帶來嘅不便或不滿，唔work囉！你依然係阻Q住我架！