啱啱喺AlexBB一篇關於最近孖妹嘅復出演唱會，留完言發覺都唔係好夠喉，於是再喺度嘈吓。
我都覺得由得佢哋啲粉絲自我陶醉一番都不為過
不過我真係好討厭佢哋講黎講去都係話自己好努力,叫人俾機會,支持佢哋... 老土啲講句:新界啲牛夠勤力啦,係咪都要頒個獎俾佢哋?!
做藝人知道自己長處,定位,你明知係sell靚樣sell青春咪拍下廣告拍多幾本寫真囉,唔好次次喺台上面喊到一句句話自己已經好努力...問題係你不嬲都唔係賣實力架啦... 你係努力咗都唔唱得嘛,唱片公司幫你傾掂個獎就乖乖攞啦,唔駛交咁多戲架!
我明白娛樂圈遊戲規則，並唔係針對佢哋喺樂壇上嘅貢獻，正所謂「曹操都有知心友」，每個藝人一定有佢哋自己嘅市場同生存價值，但我真係好討厭佢哋成日講黎講去三幅被，話自己已經好努力，每次都喊到一句句好似欠咗佢哋咁，啲戲真係好over無進步過﹝阿sa好少少咁啦﹞。啱啱出道就話啫，咁多年都仲係俾呢個七號感動樣同呢啲台詞，真係好懨悶架！
如果你話佢哋就係因為除咗呢樣嘢就唔知仲可以講乜，咁ok囉。
不過又唔係喎，話晒我都係觀眾丫，雖然睇電視唔駛錢啫，都諗句好啲嘅entertain下我丫。
我真係唔係針對佢哋架，仲有好多例子都又假又悶架，好似古sir到宜家依然鐘意彈句﹝真係笑唔出仲想喊嘅﹞食字gag或者IQ題，千fa仲成日失驚無神喪笑，都咁大個人咯，act your age啦！劉華都chok少咗樣啦！
No comments:
Post a Comment