感恩

很久沒有在這裡更新了，完全放棄很容易，但覺得當初雄心壯志開始了但落得如此收場實在有點心有不甘，也有點難看‧‧‧

距離對上一個post也有四個多月，當時仍然"量地"。要返回老本行不難，行業反應、offer的待遇﹝竟然﹞也不俗，但心想難道真的要重回老本行？心情有點忐忑，真的是“當初的堅持現已令你很懷疑”‧‧‧幸好在最後關頭、快要放棄的時候，竟然可以成功轉行，而且還是心宜的機構！實在很感恩！

新工作不算很忙、也沒有很大壓力，很少是非，同事很好，比起對上一份工，無論工作性質及環境，都是天堂與地獄之別，也可能是上一份工壓榨得很緊要吧。可能是因為行業的文化，現在的同事打扮、對物質的要求都很樸實，最初上班時還是老樣子穿得很formal，過了一個星期已給同化了，日日casual wear，偶然也想稍為打扮一下穿穿高跟鞋，同事也會即刻問是否有約！哈！

感恩可以擠身到這行業，大部分同事都是帶著使命感來工作！這不是浪漫的想法，是真的有實踐﹝當然我也會時常提醒自己不要有halo effect﹞！已經開始萌生在這行業安身納命的想法了﹝當然大前提是先過了probation‧‧‧﹞，也希望這種工作態度可以歷久常新。

大概是之前長時間的待業，多了時間審視一下自己的生活及需要，有了些想法，減少了無謂的朋友和約會，想多花時間與家人一齊﹝更重要是要收歛一下對家人的脾氣﹞；不熟悉政治，但也要多關心一下身處的社區，與其手指指，不如直接多做對世界有益的事吧，“袖手旁觀就是助紂為虐”。
入息是少了，但身體精神也好了，就如上次與好友見面時說，現在感到很滿足。

倒後鏡

“兩人之間最悲哀的，應該就是看著一同攜手看過的美好風景，在倒後鏡中漸行漸遠吧？然後明白，再眷戀也囘不去了。”

讀著嫣薇小姐的這一段，真的感到心揪了一下。

任何事，真的是再眷戀也回不了去。偏偏我就是徹頭徹尾一個grumpy old woman，不是沒有新鮮事讓我感到驚喜，令我對未來還有憧憬，只不過轉眼nostalgia又會襲來。

別人看我是生活得很隨心，會說說笑笑，很懂得找樂。我也確實不喜歡常常懷緬過去、傷春悲秋，不要說最親近的知己好友，就連自己也會對這種態度懨悶。己所不欲，勿施於人。

之前讀著Brigitte Giraud那本法文翻譯本《愛情沒那麼美好》，其中一篇寫到“...那個時候，我還不知道我們可以一如往常生活，工作，在開玩笑的同時心如刀割...”“...我完全不知道，我們可以在傷心欲絕的同時，一面全神貫注工作，精神崩潰同時又笑容可掬，悲傷又自在，蒼涼又愛戀...”。其實每個人或多或少也是在這情況下亦步亦趨、恍恍惚惚的生活下去吧。

男人

噙晚睇明珠台卧底俏王子,
裏面有三個王子,
去到英國揾女朋友.
係一個真人show,
真正的王子揾平民女朋友.
內容唔係重點,
重點係其中一個王子的一番說話:
"我鐘意胸大樣靚,
人品几好都無用,

唔靚我都唔會要!!

我會擇20-29的女仔.

因為女人唔係葡萄酒,

女人係牛奶,

係有限期.

我一定會揾後生的!!"

身為女性的我,

當然好反感.

但想深一層,

他的說話正正係男人(不論國籍)的心聲.

我係男人都可能會係咁.

不過,

講呢番真心話的王子,

即中間最肥個件,

佢胸大肚大無樣無品,

都懶係咁大支野,

就算係王子都真係好惡頂.

正如好多無樣無型無錢無品的男人,

品評女性一樣.

如果下一世可以比我選擇,

我寧願做一個無樣無型無錢無品的男人,

都唔做一個有樣有波有錢有品的女人.

因為女人係牛奶,

而男人就係葡萄酒.

點計都係做男人易過日子得多!!

貓毛

我想只有真正愛貓的人,
都未必忍受到貓毛.
牡丹講得啱,
因怕貓跳樓,
所以就算我有露台,
我都唔多開.
屋企長期處於無空氣流通的狀態!!!
巨先生忍受不了,
每次去我屋企,
佢都趁我唔為意去剃我隻英短的貓毛.
我身為主人當然唔鐘意.
但我都忍唔住由得佢剃.
因為我隻英短係會伏係度唔郁比人剃!!
好似綿羊咁......
望住我隻英短好悠閒咁伏係地上面,
再望住巨先生流晒汗烏低身同佢剃毛,
唔怪得人地話貓先係人類的主人!!!!

非誠勿擾

每一次都一定會有合理原因，所以我一直都不多說、不聞不問，怕會給你騷擾、令你心煩。

明白事理，但做不到心悅誠服，因為我都會感到失望。

一隻手是拍不響的，無論是爭執還是經營一段關係；兩種結果都達不到，因為連爭執的機會都沒有。

學習

感激小時候媽媽迫我學鋼琴，讓我現在有一定程度和能力嘗試自學爵士樂鋼琴，因為老師難找。希望老來可以有所寄託。

也想學水彩畫，喜歡顏料和著水，淡淡的，徐徐數筆就可以勾勒出輪廓，眼前景物就給暈開融到畫紙上。世間所有事物從來都不應巨細無遺的給呈現出來。

初學西班牙語，雖然法語比較好聽，而我也比較喜歡意大利這地方。或者將來會用得著。

一直也喜歡電影，也愛音樂，兩樣都是可以避世的好地方。

最近多看點書，所以心情不太好。

培養了跑步的習慣，希望可以鍛鍊好身體，而且知道很多時候都只會是一個人走。

好想懂一些手藝，烹飪也好、做圖章也好、裁衣也好，前陣子真的有站在一旁看媽媽用衣車，農曆新年也跟她學弄蘿蔔糕。妄想以後一切都可以靠自己，不假外求。

你問我為什麼現在才學駕車，我答了第一句：「忽然覺得像游泳一樣，也算是一種求生技能吧。」

第二句沒有說出來：「想照顧自己，而且將來爸爸媽媽老了，出入接載也比較方便。」

年廿九辦年貨

噙日拾左一日屋,

寫埋blog再拾下野已四點几.

今朝十點几又起身,

去左入貨......買衫!!

新年著新衫係中國人的傳統,

大條埋由咁放肆去買.

最開心係,

買完衫入左一間傢俬店,

好靚呀!!

比買衫仲開心!!

於是返屋企又拾屋又重新諗佈置!!

我好鐘意個塊啡色木牌,

上面的鹿係刻出黎,

我再用塗改液塗返d線,

清楚晒!!!好靚!

另外gratitude個木牌都好吸引,

但仲未諗到放邊好!

佈置自己屋企係一件樂事!!

雖然星期六日都唔洗返工,

但好多時都約人或要做返工野,

根本無比過時間自己咁.

呢兩日就唔同,

完全唔約人,

完全做自己野,

感覺好充實!!

過得好幸福!!

另外,

又再拾過書房的枱!!

咁樣做野都做得開心好多!!!

龍哥

少女年廿八

如果唔係年廿八,

我都唔可以立定決心大掃除.

雖然只係一個人住,

但我原來真係有好多好多野,

多野都係其次,

最恐怖係,

屋企真係好污糟,

我已經唔多下廚,

但我足足花左四個鐘洗廚房!!

單單一個廚房,

已經發現有好多我唔知几時買的野出現!

我一直拾,一直拾,一直拾......

咁就拾左十二個鐘......以上,

但仲未拾睡房,仲未洗露台,仲未洗雜物露台......

成個過程好辛苦,

不過都有驚喜,

就係揾返中二的寫作練習簿!!

個時我同同學A好重視呢本寫作練習!!

呀sir任我地自由發揮,

而我個時就練習寫詩!!

睇返真係覺得好少女!!!

節錄其中一部分:

"儘管照片已泛黃,

往事已淡忘."

仲有另一首的其中一部分:

"風送風,雨滴雨; 我送你,雨滴淚."

真係好少女!!!!

雖然自己睇返都覺得唔係几好意思,

但都好令人回味!!

學生時代寫的野,

依家真係寫唔返!!

拾屋拾到零晨先揾到呢本寫作練習,

又真係更加有詩意!!

另外,

我仲重新拾過書房!!

年廿九繼續努力拾屋!

口是心非

同非常熟嘅朋友好少會MSN，因為只會直接打俾對方傾；同一般朋友MSN遁例第一句都會禮貌地問一聲"How are you doing?"，我發覺近年真係唔識點回應呢啲causal greeting。

明明只係一句簡單社交問候語，問嗰個其實係無心，點解我呢個答人嘅要咁在意？

要費盡心思點樣答先唔會敷衍得黎又能夠簡單準確地表達實況但唔會洩露太多私隱之餘避免令對方有太大壓力應該點樣回應我？

事實上係凡人一個、生活平淡，稱唔上"great"；
"so-so"翻譯成中文其實係最貼近實況，但英文原意又會令對方誤會你生活不如意，於是﹝有出於關心或者其實只係好得閑嘅人﹞會追問你係咪發生乜嘢事；
如果只係因為俾老細省、尋日睇中嗰個袋今日再去睇已經無咗、方大同隻〈橙月〉攞唔到獎‧‧‧而講"bad"，又真係愧對被監禁嘅劉曉波同埋真正受苦嘅海地人民；

所以當生活還可以嘅時候，我會講"fine"，大方得體又唔會overrated；
當真係唔開心嘅時候，我會講"ok"，對方聽落又真係覺得ok喎唔會追問落去。

咁樣算唔算口是心非？

Grow Old With You

龍哥

我又唔係好記得我哋會lunch預先約埋行返屋企，只係記得每朝早會約喺OK對面嘅士多等一齊行返學。
其實我都好鐘意同知心朋友一齊散步傾計。有次假日我去探阿鳳，無特別安排節目就只係喺佢屋企附近散步傾計。
我最近又發現喺上水同粉嶺之間嘅一段路好靚好舒服，假日無乜車，兩旁有好高嘅樹，有時會有人踩單車經過，好似上海﹝其實我無去過上海，只係覺得好似方大同【橙月】隻碟入面喺上海拍嘅相﹞。

宜家我覺得同啲朋友又進入另一階段，就係好少再行街shopping，反而只會約食飯食tea見面傾計。話當年。
人大咗同朋友相處嘅習慣唔同咗，口味都唔同咗。 以前就話懶型，扮靚靚去啲fancy食店cafe呃埋自己話"quality of life"！宜家實實際際最好上朋友屋企過。最近同幾個閨中密友食飯已經由西式食肆逐漸轉去茶樓飲茶，我哋仲戲言遲啲應該會約埋一齊返深圳揼骨，就好似我哋阿媽咁。

另
其實，成日話當年，真係代表老咗架！
不過，其實我覺得能夠同朋友們一同成長係一件幸福事。

牡丹

一段路

噙日完左陸運會後,
我同豬九兩個同事走.
由元朗大球場行去元朗廣場個邊,
初初,我覺得行咁遠好辛苦,
好唔想行.
跟住豬九同事一就話,
邊行邊傾好快會到.
我地一路行一路傾,
果然好快到.
豬九同事一:"好難得可以咁傾計."
我:"你成日都係豬九撩我地傾計架啦!"
豬九同事一:"唔同!!你唔覺我地好少係街度傾計?我鐘意一路行一路傾!"
豬九同事一的說話,令我諗返讀書個陣時.
中學個陣,我好鐘意放學行返屋企,
有時同學送我,有時我送同學.
我同牡丹唔同班,
但住得好近.
當時我的好朋友同牡丹一班,
咁我就識左佢.
我唔記得我係點樣同牡丹熟,
我只記得我地的友誼係建立係個段回家的路上面.
好多時,我地lunch會預先約定行返屋企.
中五後,
我地唔同學校,
到大學到工作個時,
中間有大段時間無見.
但到依家,
我地唔洗warm up,
都可以好feel free講自己的諗法同理想.
以往一段段的路程,一段段的對話,
成為我地友誼的植根!
另外,
我發現人大左,
好多時出街行的目的都係shopping,
我已經好耐無特別為同人傾計而走一段路.
可能勁感冒,
突然諗起好多往事,情緒有點down,
又或者係,
我覺得自己真係老左啦!
龍哥

「出嚟傾啲嘢，攪啲嘢呀」

近幾年於朋友閑談會面時經常出現嘅一句說話。

剛剛畢業出嚟時雄心萬象、對社會充滿理想，對自己期望甚高；再過多幾年係社會打滾過，又受唔住現實殘酷打擊，所有幻想破滅。

呢啲都係身邊人寫照。

有啲人*安於現狀/一蹶不振，選擇繼續「*生活/生存」落去。﹝呢啲先係高人！看破紅塵，屬大智慧！﹞

有啲人依然充滿理想、勇氣，選擇繼續為理想打拚，與社會不公平抗爭，直頭係向世界出發！﹝對此本人係深感佩服！﹞

至乞人憎係中間嗰啲！明明肉體行為上已經妥協，偏偏思想精神上又心有不甘。條件、能力、運氣、理想、勇氣、行動力，樣樣都得少少，發唔到圍但又死唔去，蠢蠢欲動其實係坐以待斃，鬼鬼祟祟咪就好似曱甴咁囉！

無錯，我就係中間呢類！

我深信呢個blog就係蠢蠢欲動之始到坐以待斃當中不可或缺嘅一環。

*請自行詮釋，刪去不適用者。

開發自己

噙日同牡丹打邊爐,我地傾左好多好多野.

返到屋企,

我突然覺得外面的世界好大,但其實自己內在的世界都唔細.

自己內在仲有好多未被開發的地方.

我拎返以前的sketch book出黎,

我突然睇返2005年我畫左一半的故事.

2005年的我,畫到中途無靈感就停左.

我同自己講,有時間再續.

但係,一停就停左4年多!

噙晚同牡丹的邊爐,加埋呢個4年多前畫到一半就停左的故事,

令我更加覺得,時間係過得好快好快.

我要趁自己仲有閑情依然故我的時候,

要好好開發屬於我自己的世界.

一於向自己出發!!!

龍哥